Khatla TBL-in Vishesh an neih belh

Zanin dar 7:45 hian Hawla Indoor Stadium, Republic Vengthlangah Khatla TBL-in Zarkawt Serpents an hmachhawn dawn a, Mizoram Super League champion lai hian an American player Chris Solomon chauh an chhawp chhuak dawn lo - Vishesh Bhriguvanshi pawh a tel dawn.

Khatla TBL-in season thumnaah an beisei ang result ṭha an la nei lo a, an match hnuhnung bera Zarkawt BCA laka 67-51 a an chak lohna hliah khuh leh theihna ṭha ber chu nomawi a ni tih an hria. Garry Gill-a'n amah chauhin nomawi a keng tel lo tih an hre tawh a, UBA-a Bengaluru Beast guard pahnih Solomon leh Vishesh an lakluh leh takah chuan an hawi sang leh thei tawh ang.

Season liam ta khan MSL2 final game 1-ah Tuikual South-in 78-71 in TBL an hneh a, amaherawhchu game 2 aṭangin Vishesh a inlar ṭan. Khatla hian 106-84 in game 2-ah hnehna an chang a, nomawi chawi nan 86-74 in Tuikual South an hneh leh bawk. TBL champion nan hian Vishesh a thawh hlawk a, a chevel hmuh a nuam, tunah pawh a la thlahniam lo - Federation Cup neih zawh taka MVP chu Khatla lak thar Vishesh hi a ni.

Zarkawt Serpents erawhin chan­chin ṭha an nei lo a, captain Hming­­thanmawia a la dam loh bakah khup hliam vangin Robert Lalfakzuala an chhawr theih hmel loh. Coach Victor Van­lalmawia chuan, "Kan player in­hliam hi player dang tan hun ṭha a inhawngah ka ngai. Khalta TBL hi club ṭha an ni a, hneh tur chuan a ṭha thei ang bera khelh a ṭul dawn bakah veng mipui ṭawiawmna a ṭul dawn a ni," tiin Vanglaini palai a hrilh.

Zanin Inkhel Tur
7:45 PM Khatla TBL Vs Zarkawt Serpents
April 7, Zirtawpni
7:45 PM Tuikual South BC Vs Chanmari Hollow BBSP