Chelsea leh Man United an chak chiang

Inrinni zan Premier League inkhelah Chelsea chuan an mikhual Burnley chu 3-0 in an hneh a, Old Trafford-ah Man-chester United-in Norwich City 4-0 in an sawp bawk. 

Frank Lampard-a hote hian point 39 hmuin palinaah an awm a, Ole Gunnar Solskjaer-a hoten point 34 hmuin panganaah an awm thung. 

Lampard-a hnuaiah Chelsea rawlthar ten theihna an nei sang tih a lang zel. Mason Mount leh Tammy Abraham ten hmun pawimawh an chan chhoh hnuah left back James Reece leh winger Callum Hudson-Odoi te theihna a lang.

Stamford Bridge-ah Burnley-in Ben Mee hmangin goal khung hmasaah an inngai a, offiside vangin pawm a ni lo. Hemi hnu chuan Chelsea-in inkhel an thunun a, minute 27-naah Willian-a penalty hlawhchhuah chu Jorginho-a'n 'cool' takin a khung.

Minute 38-naah James Reece-a cross chu Abraham-a'n ṭha zetin a tauh lut, Chelsea wing back khel ṭha zet Reece hi kum 20 chauh a nih bakah Premier League-ah vawi 11 a inlanna chauh a ni. Second half ṭantirhah Cesar Azpilicueta vawrhluh chu Callum Hudson-Odoi-a'n a tlawh lut.

Season liam ta khan Hudson Odoi hi Bayern Munich-in an sawm avangin player langsar a ni a, nikum April thlaa a inhliam hnuah ngai a awh leh ṭan chauh. Kum 19 mi English winger tan tun ṭum hi Premier League-a a goal hmasa ber a ni. Blues boss Frank Lampard chuan, "Six-yard box aṭanga Callum-a'n goal a khung hi yard 30 aṭanga a khung aiin minti lawm. Goal hnaihah a lut ngam tih a pholang a, a khelh danin player ṭha tak a ni tih a pholang. Callum tak tak kan hmu e," tiin July thlaa kum nga daih contract ziaktu Callum Hudson Odoi a fak.

Manchester United ṭantuten Sir Alex Ferguson-a hunlaia an hmun ṭhin inkhel thunun chunga chak chu Inrinni zan khan an hmu leh ta a, mikhual Norwich 4-0 in an sawp. Solskjaer-a hote tan Marcus Rashford-a'n goal hnih khungin Anthony Martial leh substitute Mason Greenwood ten goal khat ve ve an khung.

Rashford-a'n goal khatna a khung theih nan Juan Mata ball pet fing tak hmuh tur a awm. Brandon Williams-a'n goal khung theihna hun ṭha bawhpelh mah se Rashford-a penalty khung tur a hlawhchhuah avangin inliam vanga squad-a awm lo Luke Shaw tan awlsam taka khelhna hmun chan let theih a ni lo ang.

English forward Rashford hi kum 22 leh thla hnih mi chauh a ni nachungin Manchester United tan match 200 a khel tling der tawh. Rashford hian match 200 khelh tlin hma lamah George Best (kum 21 leh thla 7) leh Ryan Giggs (kum 21 leh thla kua) tluk lo mah se Cristiano Ronaldo (kum 22 leh thla riat), Wayne Rooney (kum 22 leh thla 11) leh Bobby Charlton (kum 24 leh thla li) te record a khum thung. Inkhelh banah United boss Ole Gunnar Solskjaer chuan, "Kan khingpuite khan kan thawhrimzia an sawi zui ngei ang," tiin a naute khelh danah a lawm thu a sawi.