AFC Cup Bagan chakpuitu Jeje

Mizo tlangval Jeje Lalpekhlua'n goal a khung leh ta - Thawhlehni zan khan AFC Cup group match-ah Mohun Bagan chuan Abahani Limited Dhaka an mikhual a, 3-1 in hnehna an chang.

Kolkata club tan Jeje bakah Balwant Singh leh Sony Norde chuan goal khat ve ve an khung bawk a, Bagan-in AFC Cup match hnih an khelh tawhah vawi khat hnehna an channa a ni.

Inkhel chu

Mohun Bagan coach Sanjoy Sen-a'n league match-a Bengaluru an sawp ṭumin Jeje leh Bal­want chu AFC Cup thlir chunga a hahdamtir thu a sawi a, Indian coach hian a sawi ang ngeiin Thawhlehni zan inkhelah striker pahnih hi tlarhmaah bul a ṭantir - Sanjoy Sen-a'n duh a thlang sual lo.

Mikhual team tan Cardiff City striker hlui Jonathan Brown chuan minute 21-na lekah goal a khung a, Bagan an buai phah lo. First half hun pek belhah Jeje-a'n si phurh sutna goal a khung a, Balwant-a ball cross Norde-a'n a siamsak chu a ke veilamin ṭha zetin a khung.

Chawlhlawk hman a ni a, inkhel ṭan leh aṭanga minute thumna lekah Balwant chuan Katsumi Yusa hnen aṭanga a ball hmuh chu hmahruaina ni turin a khung. Minute 87-naah Sony Norde a inlar ve thung a, Haitian winger hian a mimal thawhrah sengin an goal thumna khungin Bagan an chak chiang hle.

Jeje = goal

Mizo tlangval Jeje-a'n tun season AFC Cup-ah goal thum a khung tling leh der tawh a, sea­son hmasa khan Asia khawmualpui inelnaa season khata Indian player goal khung hnem ber ni turin goal sarih a khung tawh. Asia huap club inelnaah Jeje-a'n goal 10 a khung tawh a, Indian player zinga khung hnem ber Bhaichung Bhutia-a'n goal 14 a khung.

Jeje-a chungah Bhai­chung bakah hian goal 13 khungtu Mohun Bagan legend Sisir Ghosh leh Churchill Brothers leh Bengaluru tana goal 11 khungtu Sunil Chhetri-te an awm. Bhaichung leh Sisir Ghosh an chawl tawh a, India captain Chhe­tri hi kum 32-a upa a ni tawh - Jeje-a tan record siamna kawng a inhawng zau hle.

Bagan hmabak

Mohun Bagan-in I League table-ah pa­thum­na dinhmun an luah mek a, match khata khel tlem zawk nichungin hma­hruaitu Aizawl FC chu point liin an phak lo mek a, East Bengal aiin point khatin an hnufual bawk.

Mahse, Sanjoy Sen-a enkawl club hian April 9 zanah Kolkata Derby an khel dawn a, an chunga awm East Bengal point chhuhsakna remchang a ni - an match hnuhnung pahnihah goal ruk an khung tawh avangin an inringtawk khawp ang.