Zarkawt BCA-in semifinal an lut

Mizoram Super League Season 3-ah Zarkawt BCA-in match thum lekah semifinal ticket an nei a, Thawhlehni zan khan Mission Veng Vikings 68-57 in an sawp.

Zarkawt coach Lalruatfela chuan Vanglani palai hnenah an vanneih thu sawi mah se tun season-a an hneh pathum - Khatla TBL, Tuikual South leh Mission Veng Vikings te hi tun hnai record thlira a ṭha pathum an ni a, an chak chhan hi vanneih vang chauh a ni lo.

Mission Veng Vikings erawh an player thar American player Ronald March leh IOB center Rikin Pethani te tela an match hmasa berah hnehna an chang zo lo. Vikings-in an match hmasa bera Chanmari Serpents an hnehna MSL Board-in rematch tura thutlukna an siam sak hnuah vanneihnain a kalsan a, Chanmari Hollow point khatin an hneh loh zui bawk avangin tun season-ah chak an la nei lo a ni.

BCA ṭhatna Mizo

Zarkawt BCA-in MSL khel zinga lian ber Amritpal Singh an nei a, feet ruk leh inches 11-a sang player hian vawi hnih dunk leh mah se BCA chakna hnar erawh Mizo player-te an ni. ONGC player Amritpal leh Yadwinder Singh te point hmuh belhkhawm chu point 23 a ni a, Mission Veng player thar March leh Pethani point hmuh zat belhkhawm point 26 aiin point thumin a tlem zawk.

BCA tan Mizo parukin point an nei a, an point hmuh belh­khawm chu point 46 a ni. Zarkawt BCA tan hian Zo­nunsanga'n hmun pawimawh a chang nawn a, Henry Lalramngaihawma'n a ṭhatna pholangin Dennis Lalruatfela, David Lalruatfela leh Matthew Lalremtluanga te hming lam hmaih a thiang lo.

Vikings tan erawh Mizo pali chiahin an khung a, an point neih zat pawh point 31 chauh a ni. Captain Moses Zoremmawia'n point 16 nei pha mah se Lalrina Renthlei-in zan dang a pha lo a, American player March-a vanga khelhna hmun chang tam lo Michael F. Lalawmpuia'n a club hlui lakah point a nei lo!

Kan vannei - Afela

Zarkawt BCA coach Lal­ruat­fela chuan, "Pathian vang liau liau a ni a, fixture harsa tak kha awlsam angah min chhuahsak a ni. Tuikual South kan hneh khan kan inkhelh niah an state pawn player-te an thleng chauh a, Khatla TBL kan hmachhawn ṭumin state pawn player pakhat chiah an kawl a, Vikings pawhin March leh Pethani training an neih pui hman lo bawk. Vikings khan March-a an hlawk pui aiin keimahni lam khan kan ṭhatpui zawk a ni," tiin an vanneih thu Vanglaini palai a hrilh.

BCA boss Afela chuan sawi chhunzawmin, "Team zawng zawng inpuahchahna a ṭha a, kan danglamna chu result ṭha kan neih avangin inrintawkna kan ngah a ni. Fitness ṭha pawh hi inrintawkna tel lo chuan a tlahniam leh mai a, tunah chuan team boruak a ṭhat bawk avangin kan khel ṭha a, hmasawnna tur erawh a la tam hle," tiin an ṭhat dan ber an la thlen loh thu a sawi.

Kan zia kan hloh - ChD-a

Mission Veng Vikings coach Reuben Lalchhandama chuan, "March-a leh Pethani an rawn thlen avangin kan Mizo player-te an lo buai ve ringawt a, an theihna an hloh vek a ni. Foreigner emaw state pawn player chu vawi khatah pakhat chauh kan hmang thei a, Mizo chu pali zel an khel dawn tih kan sawi a, mah se court chhungah mawhphurhna an la lo. Match thum khelh tur kan la nei a, semifinal lut theihna kawng hi a la inhawng zau hle," tiin Vanglaini palai a hrilh.

Dan chungchang sawi zuiin ChD-a chuan, "Three-second rule hi kan referee te hian an ham tam tawk lo a, hei hi Mizote kan chet ṭhatna tura dan ṭha tak a ni. Ring hnuaiah palian a din reng chuan ball lakluh a huphurhawm ṭhin a, an thiamna ang an lantir ṭhin loh phah a ni," tiin referee-te chu ṭha zawka dan lekkawh tura duh thu a sawi.

Inkhel Thlirna Tawi
Mission Veng Zarkawt BCA
Score
March 22 Amritpal 18
Moses 16 Zonuna 15
Zonuna 6 Henry 14
Rebounds
Moses 7 Amritpal 15
March 6 David 8
Assists
Lalrina 5 Zonuna 4
Mission Veng Zarkawt BCA
13 1ST 18
14 2ND 25
27 HT 43
19 3RD 15
11 4TH 11
57 TOT 69