IPL-ah Maha Derby

Indian Premier Lea­gue-ah Maharashtra Derby hmuh tur a awm nghal dawn a, zanin dar 8:00-ah Rising Pune Supergiants chuan Mum­bai Indians an mikhual dawn. Team pahnih in­khel tur hi batsman nei ṭha leh bowler nei ṭha inhma­chhawn tur an nih avangin a hmuhnawm ang.

Pune tan an batting line up hi an inchhuanna a ni. IPL 10-a hlawh hnem ber ni turin English all rounder Ben Stokes chu vaibelchhe 14.5-in an lalut tawh a, vaibelchhe riat hlawhtu Ajinkya Rahane, South African batsman Faf du Plessis, Australia captain Steve Smith leh India captain tawh zinga hlawhltling ber ang hiala chhal ngam MS Dhoni te an kawl miau avangin an inchhuang a nih pawhin a awm lo hran lo.

Rising Pune batting line-up vanga hlauthawng lo tur an awm a nih chuan Mumbai Indians tluka bowler nei ṭha an awm bik chuang lo. Twenty20-a Indian batsman ṭha Rohit Sharma captain-na hnuaia khel tur club hian Pune batsman ṭha rual hmachhawn turin vaibelchhe 8.1 hlawhtu Lasith Malinga, New Zealand chhuanvawr Mitchell Johnson leh Tim Southee, Indian bow­ler tawnhriat nei ngah Harbhajan Singh leh hmabak nei eng Jasprit Bumrah te an kawl a, Pune laka hnehna chang turin an ṭha tawk.