Portugal leh Italy hmachhawn tur India U17
October 6 aṭanga khelh ṭan tur FIFA under 17 World Cup khel tura inbuatsaih mek India U17 chuan Portugal U17 leh Italy U17 chu friendly match an khelhpui dawn a, Ligue 1 club ṭha Paris Saint Germain U17 an inkhelhpui bawk ang.
Portuguese coach Luis Matos enkawlna hnuaia awm mek India U17 hian Lazio Cup inelna an hmachhawn dawn bawk a, he inelna hi a vawi 10-na tur niin Siena, Partizan Belgrade, Sparta Prague, Qatar Aspire Academy, Partizan Belgrade, Inter (a zawnin kum thum) leh Fiorentina academy te chu a champion tawh an ni.
India U17 team hian April 10-ah India chhuahsanin Portugal-ah camp an nei ang a, ni 34 chhung coach Matos-te ramah hian training an nei dawn a ni. AIFF general secretary Kushal Das chuan friendly match khelhpui tur hian Austria leh Hungary chu inbiakna neihpui mek an nih thu a sawi bawk.
FIFA U-17 World Cup 2017 hi India-in a thleng dawn a, October 6-a khelh ṭan tur niin October 28-ah final khelh a ni dawn. Khawmualpui paruk aṭangin team 24-in inelna hi an hmachhawn dawn a, Kolkata, Kochi, New Delhi, Mumbai, Guwahati leh Goa-ah te inelna hi neih a ni ang.