Saina leh Sindhu an tla nghal

Indian shuttler chhuan­vawr Saina Neh­wal leh Pusarla Venkata Sindhu te chu Malaysia Superseries Premier badminton tournament-a an match hmasa berah an chak lo nghal.

Nimina inkhelah London Olympic bronze medalist Saina hi Akane Yamaguchi lakah minute 56 chhungin 19-21, 21-13, 21-15 in a chak lo. World number 1 hlui Saina hian game hmasa ber a lak hnuah game hnihnaah pawh 11-8 in hma a hruai hman, mah se Japanese shuttler hian game hnuhnung pahnih lain hnehna a chang.

Inkhel hnuhnung zawk­ah India Open cham­pion hlim PV Sindhu chu Chen Yufei lakah 21-18, 19-21, 17-21 in a tlawm nghal ve bawk. Rio Olympc silver medallist Sindhu hian Macau Open 2015-ah Chinses shuttler hi deciding game-ah a lo hneh tawh, tun ṭumah erawh seeded paryukna Sindhu a vannei ta bik lo.

Nimin inkhel dangah Carolina Marin chuan Yip Pui Yin lakah 21-16, 21-11 in hnehna a chang. Rio Olympic champion hian India Open final-a PV Sindhu a hneh lohna khan Malaysia Open-ah rah ṭha a chhuah a beisei thu a sawi.

World champion vawi hnih ni tawh Marin chuan, "India-ah ka vanduai tawh a, tun ṭumah erawh ka vanneih ni a in herchhuah ngei ka beisei. Malaysia-ah hian sulhnu ṭha hnutchhiah turin theihtawp ka chhuah ang," tiin a sawi.