Harhna chang Leicester City an kal zel

Leicester City-in mak taka Premier League nomawi chawi­puitu Claudio Ranieri an ban hnuah an harhna chan an chhawm nung zel a, Italian manager hun laia tlak hlauhawm dinhmuna ding club hi tunah chuan top 10-ah an invawrh chho ta - Thawhlehni zan khan an mikhual Sunderland chu league match-ah 2-0 in an hneh a, Jamie Vardy leh Islam Slimani ten goal an khung.

Foxes-in season tawp thleng an manager ni tura an ruat Craig Shakespeare-a'n Leicester a hriatchian zia khelmual chhunga a naute a enkawl dan hmangin a lantir zel a, match ruk a kaihhruai tawhah hnehna a la chanpui vek - Ranieri thachhang dawl ṭhintu manager hian British manager zinga Premier League match hmasa palia hnehna chang vek thei record a siam tawh chu match ngain a belhchhah.

Danglamna thlentu Marc

King Power Stadium-a inkhel­ah Foxes-in beisei an phak lo a, minute 60 chhung chu Shake­speare-a naute hian English mana­ger hnuaia an match khelh tawha an khelh danin an khel lo. Mahse, minute 62-naah Foxes manager-in substitution awmze nei a siam a, Demarai Gray leh Shin­ji Okazaki lachhuakin Marc Albrigh­ton leh Islam Slimani a luhtir.

Albrighton leh Slimani ten minute sarih chiah khelmualah hun an hmang hman tihin dang­lamna an thlen nghal a, Albrigh­ton-a'n mual veilam sir aṭanga a ball cross chu Algerian striker Slimani-a'n a tauh lut. Minute 78-na a ni a, Albrighton bawk a inlar. English winger hian khelmual lai aṭangin Sunderland lamah ball a khalh lut a, Jamie Vardy tana a siamsak chu tun hnaia harhtharna chang striker hian a hlah lo. Black Cats-in a chhan­letna an nei lo a, Foxes an chak.

Slimani-a'n Leicester tana a goal khung hi kum 2017-a a goal hmasa ber a ni a, pound maktaduai 28 man striker hian Foxes tana a goal rukna a ni. Vardy-a'n Shakespeare-a enkawlna hnuaiah match nga khelin goal nga a khung tawh a, tun season bikah Ranieri-a'n a kaihhruai lai khan heti zat goal khung tura a match mamawh zat chu 22 a ni.

Tla tur Sunderland?

Premier League table mawng berah Sunderland an awm chhunzawm zel a, him tur chuan an hmabak match riatah tlawm a thiang tawh lo. Foxes laka goal an khung loh chiah khan match ruk chhung a zawna goal an khung lohna a ni - match ruk aṭang hian point khat chiah an hlawh chhuak. Leicester lakah hun ṭha nei lo tawp erawh an ni lo a, Victor Anichebe-a'n post a pet per bakah heta ṭanga ball let hi Jermain Defoe chuan goal hrulah a pet bawk.

Sunderland boss David Moyes chuan, "Point hlawh chhuak miah loa kan ṭin tur hi pawi ka ti a, Everton lakah pawh khan zanin ang thoa post pet per chungin kan tlawm. Ka ngaihdanah chuan he match hniha pakhatah zawk talah hi chuan chak kan phu a ni. Ka nauten an theihtawp an chhuah a, kan him leh him loh hi kan kutah a la awm a ni," tiin beiseina a la nei.

Shakespeare thukhawchang

Leicester boss Craig Shake­speare chuan, "Kan ṭhat dan berin kan khel lo a, a pawimawh ber erawh hnehna kan chang kha a ni. Tun aia ṭha zawk khan kan khel thei tih ka hria a, kan tum ber chu point tam thei ang ber hmuh hi a ni," tiin him tura an beih zel tur thu a sawi.

Foxes-in Champions League quarterfinal-ah April 12 zan khian Atletico Madrid an len­chilh dawn a, hemi hma hian league match-ah Everton an lenchilh dawn bawk - an hmabak a awlsam lo. Shakespeare chuan, "Atletico nena kan inkhel tur sawi a la hun lo a, sawi pawh kan duh lo," tiin an hmabak match-ah chiah an rilru an la pek thu a sawi nghal.