Bayern Munich hneh thei Hoffenheim
Hoffenheim chuan German football-ah bung thar an kai ta. Thawhlehni zan Bundesliga inkhelah Hoffenheim hian Andrej Kramaric-a goal ropui hmangin Bayern Munich an hneh! Lammuala inkhel tawh Hoffenheim hian German champion Bayern an hmachhawn tawh vawi 17 aṭanga chak ni hmel an hmuhna hmasa ber a ni hial.
Kramaric-a goal
Rhein-Neckar-Arena-a inkhelah Hoffenheim tan hian Kramaric-a'n minute 21-naah he inkhela goal awmchhun hi a khung. Croatia international forward hian top-flight match 250-na kheltu Mats Hummels-a ball tauh chhuah chu lo dawngin rang takin goal lamah a hlap thut! Hliam vanga khel thei lo Manuel Neuer aia lut Bayern keeper Sven Ulreich tana dan ngaihna awm loin chiang zetin a goal.
Mikhual Bayen Munich hian inkhel thunun zawk mah se an vanneih ni a ni lo. Bundesliga season kal laia goal 24 khung tawh Robert Lewandowski-a'n goal bar a tih per bakah Kingsley Coman leh substitute Franck Ribery te chuan goalkeeper Oliver Baumann an paltlang zo lo.
Team pahnihte hi nikum November thla khan Bayern Munich khelmual Allianz Arena-ah an lo intawng tawh a, goal khat ve ve khungin an inhnehtawk. Tun season Bundesliga match 27 an khelh tawh aṭangin Bayern leh Hoffenheim te hian vawi hnih chiah chak lo an la nei a, tlawm tlem ber an ni.
UCL khel tur?
Beisei phak baka season duhawm hmang mektu Hoffenheim hian point 51 nei tawhin league table-ah pathumna an ni mek, pahnihna RB Leipzig aiin point khat chiahin an hniam. Pangana Cologne nen khelh zat inangah point 11 ngawta an san fal tawh avangin season tharah Champions League an khelh ngei a rinawm tawh.
Hoffenheim enkawltu kum 29-a upa Julian Nagelsmann hi Bundesliga club 18 zinga manager naupang ber a ni. Nagelsmann chuan, "Minute 90 chhung kha injury time ang veka khel turin ka fuih," tiin Bayern Munich laka hnehna chang tura a naute a fuih phur dan a sawi.
Vawi thumna
Carlo Ancelotti enkawl Bayern Munich hian Hoffenheim an lenchilh hma hian inelna hrang hranga an match khelh hnuhnung 20-ah chak loh an nei lo, nikum nipui lai a-
ṭanga German club enkawl ṭantu Italian manager hian tun season pumpuiah a naute hi vawi thum a tlawm puina chiah a ni.
Bayern hian anmahni hnaih bertu RB Leipzig lakah point 13 zetin hma an la hruai fal tho, nizan khan Leipzig hian Mainz an hmachhawn a, khelh zat inangah an inthlauhna hi a danglam leh thei. Match khelh hmabak pasarih bak an neih tawh loh avangin a zawna a vawi nga nan Bayern hi league champion ni tura rinkai ber an la ni cheu.
Philipp Lahm a inlan loh avanga Bayern captain dinhmun chelhtu Arjen Robben chuan, "Hetiang thil hi kan chunga thleng thei ve tho a nih hi kan hriat a pawimawh. Inkhel hun chanve hmalamah khan goal khat aia kan chhuah tam lo kha kan vannei a, kan insiamṭhat hnua goal dang kan khung belh lo erawh kan vanduai ve bawk," tiin a sawi.
Dortmund an chak
Bayern tan Lewandowski-a'n goal khung lo mah se Borussia Dortmund striker Pierre-Emerick Aubameyang chuan goal khung a ṭhulh lo. Gabon international hian Dortmund-in Hamburger 3-0 a an hnehna inkhelah goal khat a khung a, tun season Bundesliga-ah a goal 25-na niin top scorer ni tura a elpui Poland international striker chu goal khatin a kal pel rih.
Team Dinhmun
# Team MP W D L GF GA GD Pts
1 Bayern Munich 27 20 5 2 67 14 53 65
2 RB Leipzig 26 16 4 6 47 28 19 52
3 Hoffenheim 27 13 12 2 50 26 24 51
4 Dortmund 27 14 8 5 58 28 30 50
5 Cologne 27 10 10 7 39 31 8 40
6 Hertha BSC 26 12 4 10 35 33 2 40
7 Eintracht Frankfurt 27 10 7 10 26 28 -2 37
8 Werder Bremen 27 10 5 12 42 46 -4 35
9 Freiburg 26 10 5 11 34 47 -13 35
10 Schalke 04 27 9 7 11 33 31 2 34
11 Borussia Monchengladbach 26 9 6 11 30 34 -4 33
12 Bayer Leverkusen 26 9 5 12 40 43 -3 32
13 Wolfsburg 26 8 6 12 26 37 -11 30
14 Hamburger SV 27 8 6 13 26 50 -24 30
15 Mainz 05 26 8 5 13 34 43 -9 29
16 Augsburg 26 7 8 11 24 40 -16 29
17 Ingolstadt 26 6 4 16 25 43 -18 22
18 Darmstadt 98 26 4 3 19 17 51 -34 15