Rii & Hawla Inter Village Hnahlan leh Zotlang in final lut

Champhai District huam­chhunga football thiam ber veng/khua zawnna Rii & Hawla Inter Village Football Tournament semifinal chu nimin khan Chhangphut Field-ah khelh zawh a ni a, Hnahlan leh Zo­tlang ten hnehna an chang.

Semifinal hmasa zawkah Hnalan leh Vengthlang hun pang­ngaiah 3-3 in an inhneh­tawk a, extra time-ah mikhual Hnahlan tlangnel zawkin goal hnih an khung belh a, 5-3 in hnehna an chang. Champhai khawtual tana bei­seina chhi nung turin Zotlang in semifinal hnuhnung zawkah Khaw­zawl Vengthar chu 2-0 in an hneh.

Final hi April 7, Zirtawpni hian Chhangphut Field-ah khelh a ni ang.

Goal riat lawih

Champhai Vengthlang tan minute hnihna lekah Jonathan Lal­siamthara'n corner aṭangin a tauh goal a, Hnahlan captain Huap­zauva'n Zaremsiama Chhangte hnen aṭanga a ball hmuh chu nalh zetin a volley goal. Amaherawhchu Hnahlan goalkeeper Lalnunpuia goal kick pet sual chu Isaac Lal­ring­ngheta'n harsatna nei loin Veng­thlang hmahruaina ni turin a pet goal.

Hnahlan an insiamrem a, Sai­nghinglova tauh goal hmanga first half-a an siphurh an sut hnuah MPL club Dinthar FC tana MPL5-a inlan Ramengmawia hmangin minute 71-naah hma an hruai. Vengthlangin minute sarih a la awmin Jessy Lalmawizuala hmangin an sut a, goal ruk a lut tawh chungin chungnung zawk an awm lo.

Extra time khelh a ni a, first half-ah goal a luh loh hnuah minute 112-naah Tlangthanpuia'n Hnahlan lawmna a siam a, Zaremsiama'n midfielder Lianhminga hnen aṭanga a ball hmuh chu chak nemnghehna goal atan a khung leh bawk.

Phuba chu

Nikum final-ah Khawzawl Veng­tharin nomawi chawi turin Zotlang an hneh a, kumin­ah erawh Champhai lam an chungnung.

Zotlang defender Ramnun­sang­a'n Khawzawl defender Rohlupuia (Bawihpuia) handball vanga an penalty hmuh chu minute 32-naah a khung. Player nei ṭha zawk Zo­tlangin inkhel an thunun a, injury time-ah Chhinga Veng FC player hlui Zonunthara'n goal hnihna a khung leh bawk.

Semifinal Results
Hnahlan 5 - 3 Vengthlang (a.e.t)
HNA : Lalhuapzauva 15'; Sainghinglova 42'; Ramengmawia 71'; Tlangthanpuia 112'; Zaremsiama Chhangte 119'
VEN : Jonathan Lalsiamthara 2'; Isaac Lalrinngheta 21'; Jessy Lalmawizuala 83'
Zotlang 2 - 0 Khawzawl Vengthar
ZOT : Ramnunsanga 32' (P); Zonunthara 90+5'