Khawvela 2-na Jeremy

International Weight­lifting Federa­tion (IWF) Youth World Weightlifting Championships 2017-ah Mizo rawlthar duhawm Jeremy Lalrinnunga chuan 56kg category-ah silver medal a la a, India tan thoa inlan Zakhuma chu 14-na a ni thung.

Bangkok, Thailand-a inelna neih mekah Nilaini khan Jeremy-a hian snatch (110 kg), clean & jerk (130kg), total (240) chawiin pahnihna a ni. China aiawhtu Chen Maoran chu pakhatna niin snatch (106 kg), clean & jerk (135kg), total (241) a chawi thung; Jeremy-a'n pakhatna a tluk lohna hi 1kg chiah a ni! Pathumna chu Turkey rawlthar Toptas Caner a ni.

Nikum IWF World Youth-ah pawh khan Jeremy hian silver bawk a la tawh, kumin India team-ah han mipa leh hmeichhia paruk ve ve an kal a, Mizoram Weightlifting Association president H. Thangchungnunga chu manager a ni. Tun ṭum Youth World Weightlifting Championships hi 2018 Youth Olympic Games-a inlan thei tur thlanna a ni nghal ang.

Jeremy hian nikum khan Sub Junior leh Junior National-ah leh Commonwealth Youth-ah te gold a la, IWF Youth World bakah Asian Youth-ah silver medal a la bawk. Zakhuma hi Sub-Junior National silver medal kawl lai a ni a, international level-a a inlan vawi khatna a ni thung.

Govt. Complex rawl­thar pahnih Jeremy leh Zakhuma te hi Weight­lifting Coach (SYS) Mal­sawma Khiangte kaih­hruaina hnuaia Catch them Young 2011 aṭanga inzir chhuak an ni a, kum 2012 April thla khan Army Boys, Pune-ah lutin he hmunah hian tun thengin an la awm.