'Iron' Mike Tyson a la kawlhrawng reng

Khawvela pa kawlhrawng ber ang hiala sawi ṭhin Iron Mike Tyson chuan kum 50 chuang tawh mah se theihna a la nei sang reng tih pholangin inhnek hmuhnawm a pho chhuak a, Roy Jones Jr nen nimin khan inhnehtawkah puan an ni. 

Pay-per-view hmanga pekchhuah inhnek hi kum 50 chuang tawh boxer pahnih inhmachawnna ni mah se boxing khawvela inhnek ngaihven hlawh ber pawl a la ni reng a, PPV record hial an siam. 

Tyson chuan inhnek chhunzawm zel a tum thu sawiin, "Hei hi championship aia lian zawk inhnek a ni a, midangte ṭanpui nana ti kan ni. Inhnek kan nei thei hi ka lawm a, tih chhunzawm zel ka tum a ni," a ti. 

Weight division pali champion lo ni tawh Jones chuan, "Draw result ka nei ve ngai lo. Mahse, ka hmachhawn boxer hi a chak em a ni. A kut thlak apiang kha a na em em vek a, draw result-ah ka lawm," tiin a sawi. 

Tyson-a'n kum 54 a tling tawh a, a hmaa ding Jones lah kum 51 mi a ni - boxer tha za tak hmuh a beiseiawm lo a, mahse Los Angeles-a inhnekah hian exhibition mah ni se dar a rik rualin boxer pahnih an hmuhnawm hle. 

American fighter Tyson-a'n tun hmaa a huaisenna ang kha a la nei reng tih a lantir a, hlau miah loa Jones hmachhawn chungin attacking game a khel - Jones hian invenhim lam hna a thawk thung. 

Round riat inhnekah Jones hi a chau hma zawk niin a lang a, Tyson erawh a puan anga inhnek chhunzawm zel a tum a nih pawhin sum tam tak a la hlawh chhuak thei reng ang. 

Boxing legend George Foreman chuan, "Exhibition ka en tawha ropui ber a ni," a ti a, British boxer rothap ṭhin David Haye chuan, "Inhnek hmuhnawm tak a ni," a ti a, world super-middleweight champion hlui Richie Woodhall chuan inhnek hmuhnawm tak a nih thu a sawi ve bawk. 

California State Athletic Commission hnuaiah inhnek hi neih a ni a, CSAC hian endiktu erawh dah loin official result a awm loh tur thu an sawi. 

Hetihrual hian WBC lam erawhin official-a puanzar kher tur ni loin judge an dah thung a, judge-te en dan aṭangin boxer pahnih hi in draw-ah puan an ni ta a ni. 

Tyson hian inhnek aṭangin pound maktaduai 7.5 vel a hlawh chhuak a, la tam tham tak a ni - mahse Iron Mike Tyson hian pawisa hi midang ṭanpui nana a hman tur thu a lo sawi tawh. 

Roy Jones Jr. hian pound maktaduai 2.25 vel a hlawh thung - boxer pahnih hi round riat an inhnek a, round khat zel hi minute hnih a ni a, professional boxing pangngaiah chuan round khat hi minute thum a ni ṭhin thung.