Chelsea leh Spurs ten City tlansan
Stamford Bridge-ah Chelsea chuan an hmelma Tottenham Hotspurs laka point sariha fal chhunzawm turin Manchester City an hneh.
Premier League-ah Antonio Conte hoten match riat khelh tur an la nei a, Eden Hazard-a goal hnih hmanga an elpui Pep Guardiola naute 2-1 a an hneh avangin nomawi chawi turin an dinhmun a ṭha. Chutihrualin Spurs-in Swansea lakah comeback ropui an lantir avangin Blues hi nuamsa taka awm thei an ni rih lo.
Tihsual a langsar
Manchester City-in tum neiin Stamford Bridge an tlawh a, Pep Guardiola-a'n a chhawr meuh loh Vincent Kompany leh Fabian Delph ten hmun pawimawh an chang.
English midfielder Delph khel ṭha mah se minute 10-na lekah Hazard-a ball pet chu captain Kompany-a'n khawih pialin keeper Willy Caballero-a'n a hnahthawh tur a tiṭha tawk lo. Spanish manager Pep hi City aṭanga loan hmanga Joe Hart chhuahtirtu a ni a, City a enkawl ṭan hma hauha a buaina tun thlengin a la ching fel lo.
Minute 26-naah City-in Sergio Aguero hmangin an chhanglet a, goal luhchhanah Chelsea keeper Thibaut Courtois mawhphuh theih a ni.
Mikhual tlarhnung a buai nawn a, Fernandinho-a'n minute 35-naah ṭul lo takin Pedro lakah penalty a chawi. Chelsea tana Hazard-a penalty pet Caballero-a'n dang zet mah se a per leh erawh dan rual a ni lo - Belgian winger-in a goal hnihna leh chakna goal a khung.
Pep-a a famkim lo
Pep Guardiola hian Barcelona leh Bayern Munich-a record a neih ṭhat avangin khawvela coach ṭha ber ang hiala chhal a ni a, amaherawhchu Premier League-ah beisei a pha lo.
Chelsea boss Conte-a'n inkhelh banah khawvel coach ṭha ber tihin fak mah se thlirna dang aṭang chuan Italian manager hian amah a infak tihna daih a ni.
Pep-a enkawl City-in goal an nawr apiangin goal thei tur khawpin nawr na mah se Chelsea-in an nawr let apiangin goal chhuah thei dinhmunah an ding. Hei hi season tluana an buaina a ni a, keeper leh tlarhnung buaina hi awlsam taka siam ṭhat theih niin a lang lo.
Conte a lawm
Chelsea manager Antonio Conte chuan, "Ka hmel aṭang pawhin ka chau tih a lang a, a chhan chu ka player-te ang thoin ka inkhel vein ka inhria," tiin a theihna zawng zawng a chhuah thu a sawi.
Italian manager Conte chuan, "Chau mah ila team ṭha tak kan hneh a, kan league-a team ṭha ber kan hneh a ni. Coach ṭha tak kan nei a, khawvela ṭha ber a ni. Hetiang ang club hneh theih chu engtik lai pawhin a nuam a ni," tiin an hnehna chan hlut zia a hrechiang hle.
Tlawm duh lo
Swansea City winger Wayne Routledge-a'n a club hlui Tottenham lakah minute 11-na lekah a khung.
Harry Kane-a tel lohna Spurs-in Liberty Stadium-ah goal khung an harsat amaherawhchu hun tawp thlenga an beih hram hram rah an seng.
Minute 88-naah Christian Eriksen cross chu Dele Alli-a'n a khung a, Tottenham-in chak an duh avangin an nawr chhunzawm zel bawk. Son Heung-min-a'n minute 91-naah chakna goal a khung a, Eriksen-a'n mawi zetin minute 94-naah chak nemnghehna goal a khung leh bawk.
Tottenham manager Mauricio Pochettino chuan, "Hun tawpa goal kan khung dan kha chu a mak zawk a, amaherawhchu khami beisei khan kan nawr a ni. Kan beidawn duh lohna rah kan seng a, kan player-te thawhrah a ni," tiin an thawh hona ṭhat a sawi.