CYMA Football a awm dawn

Nimina MFA Executive Committee ṭhu-khawm chuan Central YMA-in Inter Branch YMA Football buatsaih tura thawhpuia a sawmna chu a pawm.

Mizoram chhung football inelnaa ngaihhlut ber zinga mi CYMA Football chu a awm dawn tih a chiang tawh a, inelna neih hun chiah erawh tihchian a la awm lo thung.

MFA hian an aiawha mawhphurtu turte an ruat fel nghal a, Mizoram football thuneitu sang ber chuan football kal­phung dik tak anga CYMA-in football inelna buatsaih dunpuia a sawm chu lawmawm a tih thu a tarlang bawk.

Team 191!

CYMA Football neih hnu­hnun ber chu kum 2015 kha niin team tel zat chu 191 zet a ni a, inelna vawi 18 neih tawha team tel tam ber ṭum a ni.

Mizoram chhung veng leh khua tana football thiam ber zawnnaah hian team tel an chhe ngai lo a, kum 2002-a team 98 a inlan hnuah inelna ngaihhlutah hian team 100 aia tamin inelna hmachhawn turin an inziaklut ziah.

Kumina inelna neih hun hi football season pangngai chawlh lai a nih dawn avangin team tel an tam dawn a, kum hnih liam taa record hi a khum pha lo a nih pawhin team 100 chuang an inlan ngei beisei a ni.

Armed Veng an lian

CYMA Football-ah Armed Vengin record an nei ṭha ber a, inelna awm tawhah vawi 9 final lutin vawi nga an champion.

Kum 1985-a inelna ṭan a nih khan Armed Veng hian Vaivakawn 6-3 a hnehin an champion a, kum 2003-naah a vawi hnih nan nomawi chawi lehin inelna hnuhnung pa­thum­ah (2010, 2012, 2015) an champion vek bawk.

Veng leh veng inelna ngaihhlut CYMA Football-ah hian veng 10 an champion tawh a, Lengpui chu Aizawl khaw pawn aṭanga nomawi chawi thei awmchhun an ni. Armed Veng bakah hian Electric Veng (3), Chaltlang (2), Dinthar (2), Kanan Veng, Lengpui, Ramhlun South, Ramthar Veng, Republic Veng leh Zotlang ten nomawi an chawi tawh bawk.