FIFA Ranking-a 101-na India

FIFA ranking chhuak thar berah India chu 132-na aṭangin 101-naah an kaisang a, May 1996 hnua India-in FIFA ranking-a a tawn san ber ṭum niin Estonia, Lithuania leh Nicaragua-te nen 101-naah hian an awm.

Stephen Constantine-a kaihhruai Blue Tigers (India sawina) hi FIFA ranking-ah 101-na an nih avangin AFC lamah pawh hma an sawn a, Asia khawmualpuiah 11-na an ni.

India-in FIFA ranking-a an tawn san ber ṭum February 1996-ah khan 94-na dinhmun an luah tawh a, record thar siam turin hmabak a tam tawh lo hle. Mizo tlangval Jeje Lalpekhlua'n regular taka a khelhna India team hian 101-na dinhmun luah tur hian an match hnuhnung 12-ah vawi 10 hnehna an chang thei a, SAFF huam chhunga an elpui Maldives (151), Bangladesh (193), Nepal (170), Bhutan (164), Sri Lanka (197) leh Pakistan (201) lakah chuan India hi a sang tawh hle.

FIFA ranking chhuak thar berah hian Brazil chuan Argentina lehpelin pakhatna dinhmun an luah a, kum sarih hnua pakhatna dinhmun an luah lehna hmasa ber niin Argentina, Germany, Chile leh Colombia ten an dawt. Mizote ṭan hlawh tak England chu 14-naah an awm pha ṭawk.