Hollow hmaah Tuikual South fiahna

Zanin dar 7:45 hian Hawla Indoor Stadium-ah Mizoram Super Lea­gue season 2 finalist Tuikual South-in kaithar Chanmari Hollow an hmachhawn dawn. TKS hian semifinal ticket a rang lama neih an tum dawn a, Hollow pawhin Mission Vikings an hneh tawh avangin semifinal an beisei ngam ang.

Tuikual South coach KC Lalliantluanga chuan, "Palpreet a dam ṭha tawh a, kan squad zinga dam ṭha lo awmchhun chu guard Faka chiah a ni. Hnehna kan chan ngei kan beisei a, amaherawhchu Hollow hi en liam mai theih an ni lo. Ṭha taka khel turin mipui puihna kan mamawh," tiin Vanglaini palai a hrilh.

Phengphehlep tana player langsar ber chu Amjyot Singh a ni a, NBA D-League a khel tawh Palpreet Singh Brar a dam leh bawk chuan dan an harsa a ang. Hollow lamin Mohit Bhadu leh Jagdeep Singh an nei ve tho a, UBA-a Mumbai Challengers center Jag­deep hian tun hmaa a thiamna a pholang leh a nih chuan TKS kawng a awlsam bik dawn lo.

Team tinin state pawn player ṭha an nei a, result danglamna tur chu Mizo player an ni. Tuikual South tan captain F. Zodinthara leh Lalmuanpuia Zote te an lansarh a rinawm a, Hollow lamah Van­lalṭhazuala leh Lalhma­chhuana te an hmuhnawm leh ang.