Reds tawlhthluk zanah Gunners chak

Liverpool boss Jurgen Klopp-a'n Bournemouth lakah inrintawkna an neih thu sawi mah se an pu thusawi hi Reds player-ten an umpha lo a, Sadio Mane tel loin an mikhual Bournemouth nen 2-2 in an inhnehtawk.

Reds chak zawh loh zanah Champions League khel tura an elpui Arsenal erawhin hnehna an chang thung a, league match hnuhnung pathuma chak hmel an hmuh zawh loh hnuin London Derby-ah an mikhual West Ham chu 3-0 in an ngam.

Goal 'khilai'

Anfield-a inkhelah Cherries an tlangnel a, minute sarihna lekah Benik Afobe chuan goal hmahruai a khung - he goal hi Georginio Wijnaldum-a'n a 'khilai' a ni. Dutch midfielder hian goalkeeper Simon Mignolet ball a pe sual a, he ball lo latu Afobe chuan hmahruaina goal ni turin a khung.

An intawn hmasaka Reds hneh tawhtu Bourne­mouth-in Reds an ngam laklawh a, Marc Pugh leh Joshua King ten Mignolet an chhaih buai chhunzawm. Mahse, Liverpool tan an thiampuipa Philippe Coutinho a inlar a, Roberto Firmino hnen aṭanga a ball hmuh chu an si phurh sut nan a hmang.

Minute 59-naah Wijnaldum-a'n a tihsual siamṭhat nan Divock Origi tan a cross a, Mane hliam vanga inkhel bul ṭantu striker hian a hun ṭha neih a khawhral duh lo.

Anfield-a inkhel an nih avangin Liverpool hi chak mai tura ngaih an ni hman - mah se, beisei ang ngawt a ni lo. Hun tawp nan minute li chiah a awm tawh tihah King chuan Cherries tan a khung a, team pahnihin point an insem.

Ral lian = club tenau

Liverpool-in tun season-a Premier League top six an tumah tlawm hmel hmu lo mah se an hri vei ngai an la thlah thei lo a, club tenau hneh an la harsat reng - Reds hian Burnley, Bournemouth, Swansea City, Hull City leh Leicester City an ngam lo vek tawh a, table mawngphah Sunderland nen meuh pawh an inhnehtawk tawh.

Reds manager Klopp chuan, "Kan duh ang result kan nei lo a, mah se kha aia result chhe zawk nei thei kan ni. Tun season-ah zanina kan game angah khan kan tlawm fo tih kan hre vek a, a eng zawnga thlir chuan kan tlawm lo hi a lawmawm a ni. A mawhphurtu ka ni a, simṭhat dan ka zawng ang," a ti.

Gunners laipui a puak

Arsenal-in tun hnaiah result ṭha an neih theih loh avangin Emirates Stadium-a inkhel ṭan dawnah ṭhutna ruak hmuh tur a awm nual! Mahse, Gunners-in an fans beisei ngam loh result ṭha an pe a, Hammers chu 3-0 in an sawp.

London Derby-ah goal lut lawk lo mah se Arsenal-in second half-ah an zia an pholang ṭan a, chawlhlawk hman hnuah an goal hmasa ber an khung ve chauh. Arsene Wenger-a naute tan Mesut Ozil chuan goal hmahruai a khung a, Gemany international hian Gunners tana a match 150-na a ni.

Minute 68-naah Ozil bawk a inlar a, Alexis Sanchez nen an in one-two hnuah Theo Walcott pet goal tur a siamsak. Gunners in an la duhtawk lo - Olivier Giroud chuan minute 83-naah goal class sang a khung a, an chak chiang hle.

Wenger thukhawchang

Arsenal boss Arsene Wenger chuan, "West Ham khan inkhel ṭantir lamah an goal an veng ṭha em em a, chawlhlawk hman a nih hnua kan khel ṭha ta kha ka lawm khawp mai. Ozil leh Sanchez hi player pawimawh tak an ni a, zaninah erawh ka nauten an khel ṭha vek a ni," a ti.

French manager chuan hmabak thlir nghalin, "Hun harsa tak kan paltlang a, kan inrintawkna pawh kan hloh hman hial hnua kan nei let leh ṭan ta hi ka lawm a ni. Premier League-a inum boruak san vanglai tak a ni a, khelh ṭhat zel a pawimawh ang," tiin a sawi.