Jayaram-a'n quarterfinal lut

Badminton World Federation Super Series zinga pakhat Malaysia Open khelh mekah Ajay Jayaram chuan world number 5 Viktor Axelsen hnehin quarterfinal a lut.

Nimina inkhelah Indian shuttler hian Denmark tlangval lakah hian 9-21, 21-14, 21-19 in hnehna a chang. World number 19 Jayaram hian round hmasa lamah Qiao Bin chu straight sets in a lo hneh tawh bawk.

Malaysia Open-ah hian hmeichhe singles lamah Saina Nehwal leh PV Sindhu te chu an match hmasa berah an tla nghal tawh. Tun dinhmun­ah chuan Ajay chiah hi India player zinga dam awmchhun a ni.