Vinales-a'n beisei a nei sang

MotoGP 2017 season ṭan a ni a, rider langsar leh hriathlawh tam tak kara hnehna chang thei hmasa ber chu Maverick Vinales a ni. Spanish rider hian Yamaha bike khalh chunga bike intlansiakna sang ber a hmachhawn vawi khatnaah hnehna a chang nghal.

Pathianni zanlai dar 12:30 hian intlansiak pahnihna ni turin Argentine Grand Prix an tlan leh dawn. Qatar GP-a pakhatna Vinales chuan a lakah mawhphurhna a tlak nasat ang bawkin beiseina sang tak nen inelna a hmachhawn leh tur thu a sawi.

Kum 22-a upa Vinales chuan, "Qatar-ah hun nuam leh hlimawm ka tawn avangin tun hma zawng aiin beiseina ka neih tam phah. Team dang hian na takin min el nghal dawn tih chu hrilh nawn ngai loin ka hre thei a, ka tan boruak rit tak siam tumin min nawr reng dawn," tiin a sawi.

Figueres, Spain-a piang Vinales hi British rider ropui Mike Hailwood lohah chuan bike intlansiakna sanga team thar tana hnehna chang nghal thei naupang ber a ni. Vinales hian nikum khan Suziki bike khalhin intlansiak 18 a hmachhawn zinga 16-ah a tlan tluan thei a, rider tlan tluang berte zingah a lang phak.

Rider championship-a hmahruaitu Vinales chuan, "Tunah hian tlankawng 18 kan zawh tur zinga pakhat chauh ka la zawh zo a ni a, hmabak a la tamin a la thui takzet. Results ṭha nei chhunzawm tura pawimawh chu thawhrim a ni, chu mai bakah inrintawkna nena hun hman a ngai dawn," a ti.

MotoGP world champion vawi thum ni tawh Jorge Lorenzo-a'n Yamaha chhuahsanin tun season aṭangin Ducati bike a khalh. Spanish rider hian a hmunruak luahtu Vinales chuan MotoGP-a bul a ṭan hun lai vel a hriat chhuahtir thu a lo sawi ve bawk.

Kum 29-a upa Lorenzo chuan, "Vinales-a'n intlansiak a hmachhawn hmasak ber kha ka en nawn leh a, career bul ka ṭan chhoh hunlai kha min hriatchhuah tir nasa hle. A huaisenin a fing a, chak duha a tuihalna ka hmuh khan elpui hautak leh khirhkhan berte zingah a tel phak ka ring," tiin a dahsang thiam hle.

Kuminah hian champion thei tura ngaih rider an tam - Valentino Rossi, Marc Marquez, Jorge Lorenzo leh Andrea Dovizioso te hian tawnhriat an nei hnem tawhin an theihna san zia kan hmu tawh. Championship inum boruakah rider ropui palite bakah hian Vinales hming kan lam ri zui zing deuh a nih pawhin a mak lo ang.

Tunkar tawpa Argentina GP an tlanna tur Termas de Rio Hondo Circuit hi 4.8 km a thui niin 16m a zau a ni. Kawng kawi 14 awm zinga pakua chu ding kual a ni a, kawng ngil thui lai ber 1076m a ni - bike chak bik nei tana ṭhat pui tham a ni ang. Nikum khan Marc Marquez chu pakhatna niin a hnungah Valentino Rossi leh Dani Pedrosa te an thleng.