Lewis a ṭha ber - Wolff

Pathianni chawhma dar 11:30 hian Chinese Grand Prix tlan a ni dawn a, intlansiak hmasa bera Ferrari phak lotu Mercedes team boss Toto Wolff chuan an driver Lewis Hamilton chu tunhma zawng aia ṭha zawk a nih thu a sawi.

Season hawnna Australian Open-ah Sebastian Vettel chu dan rual lohin pakhatna a ni. World champion vawi li ni tawh Vettel hi season thum chhung beisei a phak loh hnua a rawn thawhchhuah leh avangin Mercedes an inralring nghal chat hi a mak lo.

Wolff chuan, "Tun hnai kum li chhunga ka hmuh tawh danah chuan Lewis hi a ṭhat lai ber a ni. Intlansiakna hmunah leh a pawnah pawh hma a sawn hle. Melbourne-ah a duh angin pakhatna ni lo mah se China-ah chuan midang tan umphak a harsa hle ang," tiin a sawi.

A zawna season thum chhung Formula 1 team champion ni tawh Mercedes hian driver champion lai Nico Rosberg chan mah se, German driver aiawhtu Valtteri Bottas chu pathumna a nih theih nghal avangin beiseina an nei sang ang.