Real tan Morata hattrick

Alvaro Morata chuan Real Madrid tan goal thum ngawt a khung a, Leganes lakah a team hi 4-2 in hnehna a chanpui - Spanish La Liga-ah an hmahruaina an chhawm nung zel.

Barcelona tan match khat a khelh loh hnuah Lionel Messi-a'n 'mamawh chhanna' a nihzia a pholang nawn ve leh bawk a, Nilaini zan inkhelah goal hnih khungin Sevilla lakah a team hi 3-0 in hnehna a chanpui ve bawk.

Squad chhah Real

Real Madrid-in an match hmabak pahnihah Atletico Madrid leh Bayern Munich a zawnin an hmachhawn dawn a, Zinedine Zidane-a'n hei hi hriain an match hnuhnung bera Alaves hmachhawntu aṭangin player pakua ngawt a siksawi - Gareth Bale leh Cristiano Ronaldo chu chawlh hahdamtir zingah an tel.

Minute 15-naah James Rodriguez-a'n a hun ṭha neih chhawrin goal hmahruai a khung a, Morata-'n minute riat chhug leka goal hnih khungin a chhunzawm ve leh bawk. Chawlhlawk hman a nih hmain Gabriel leh Luciano ten Leganes tan rin loh takin goal hnih an khung a, Real an hawihai hman - mah se, chawlhlawk hman a nih hnuah Morata ball tauh chuan Leganes captain Martin Mantovani a per hnuah a goal a, Real an chak.

Zidane a lawm lo

Real Madrid coach Zidane chuan hnehna chang mah se goal thum ngawt an khung hnua goal hnih an chhuah chu a lawm loh thu a sawi. French manager chuan, "Kan khel ṭha em em a, awlsam taka goal kan khung hnua kan awm danin a zir loh avangin Leganes-in goal an khung. Kan inkhelah kan rilru kan pek tawk loh avangin kan khingpuite tan khan kir lehna remchang kan siamsak a, second half-ah goal kan khung hma avangin kan chak hlauh a ni," a ti.

Barca chakna Messi

Barcelona-in La Liga-ah hmahruaitu Real thlah fal lutuk an duh lo a, an mikhual Sevilla lakah ṭhat chhuah duh loin 3-0 in an sawp. Catalan club tan Luis Suarez chuan inkhel ṭan aṭanga minute 25-naah mawi zetin a bin lut a, minute hnih hnu lawkah Messi khung tur a siamsak chhunzawm.

Minute 33-naah Messi a inlar chhunzawm a, Argentine forward hian an goal hnihna volley hmangin a khung. Sevilla-in substitute Pablo Sarabia hmangin vawi hnih ngawt chance nei mah se an chhawr thei lo a, Vitolo chu minute 90-naah Neymar laka a foul avangin hnawhchhuah a ni bawk.

Barca manager Luis Enrique chuan, "First half kan khelh dan kha tun season-a chawlhlawk hmaa kan khelh tawh zawng zawnga kan la khelh ṭhat ber a ni hial ang. Team ṭha tak laka hnehna kan chan bakah game kan thunun ṭhat em avangin ka lawm takzet a ni," tiin a naute khelh dana a hlim thu a sawi.