Bielsa enkawl Leeds an chak

Leeds United-in football mawina pholangin Everton 1-0 in an hneh. Goodison Park-ah Marcelo Bielsa hoten attacking football an khel a, finishing ṭhat tawk loh vangin goal dinhmunin inkhel mawina a phawk chhuak pha lo.

Inrinni zanah hian Raphinha-a'n minute 79-naah goal awmchhun a khung a, Leeds United-in point thum hlu tak an hlawhchhuak. Carlo Ancelotti hote erawh match ngaah vawi li an chak lo a, an khelh dan thlirin season thara Champions League khelh phak a harsa dawn.

Marcelo Bielsa enkawl team a nih chuan danglamna a awm tur a ni a, Leeds khelh danah Argentine manager kut hnu a lang.

Premier League kai thar Leeds hi Everton lakah an inkil tawih lo a, ball an chan tam zawk bakah ball pass dik an ngah zawk. 

Bielsa hote hian mawl mang takin goal an nawr lo a, league top scorer ni lai Dominic Calvert-Lewin an dah ṭha. Leeds hian first half-ah ringawt vawi 13 goal-ah an pet a, goal an khung lo.

Leeds midfielder Jack Harrison-a'n hnai tak aṭangin a hlah a, first half tawp hmain goal ban a pet per leh bawk. Toffees keeper Jordan Pickford a khel ṭha a, England number 1 keeper hian Patrick Bamford leh Raphinha te goal khung tur a dansak.

Bielsa hoten player 10-a khel Arsenal lakah point khat chauh an hlawh chhuak tawh a, tun ṭumah erawh attacking football chauh ni loin vanneihna an nei ve ta. 

Minute 79-naah Raphinha-a'n box pawn aṭangin a pet goal a, Everton defender Ben Godfrey-a'n a tihtur ti tawk lo mah se Leeds-in chak an phu.

Carlo Ancelotti hoten James Rodriguez an lalut a, Richarlison leh Calvert-Lewin tlarhmaah an neih bawk avangin season bul an ṭan ṭha. Everton hian pakhatna dinhmun te an luah hman a, champion tura rinkai zingah an tel hial.

Leeds lakah pawh hian khel ṭha lo mah se vanneih ṭum chu ni se chak thei an ni. Toffees player Richarlison, Allan leh Abdoulaye Doucoure ten goal khungna hun ṭha an nei vek a, keeper Illan Meslier-a'n paltlang zo lo.

Everton hian Mersey-side Derby-a Liverpool nen an inhnehtawk hnuah Southampton, Newcastle, Manchester United leh Leeds United te an hneh ta lo. Inkhel hnuhnung parukah Fulham chiah an hneh a, 3-2 in hnehna an chang hram.