NT Biakkima a tlawm; thawh leh a tiam!

Mizo boxer NT Lalbiakkima'n beiseina sang tak nen Dubai khawpui pan mah se WBC Asia continental title a beisei chu a hlawh chhuak zo lo a, inrinni zan khan Philippines boxer ṭha Jayson Vayson hmaah a tlawm.

Sheikh AL Maktoum Hall, World Trade Centre, Dubai-ah NT-a'n a khingpui knockout ngei tum mah se round 10 an inhnek a, a tawpah Judge pakhatin NT-a chaktir mah se judge dang pahnihin Jayson chu a chak zawkah an ngai a, split decision (97-94, 93-97 & 96-94) in NT-a hi a tlawm.

Vanglaini chuan Mizo boxer hi a inhnek zawhah a be nghal a, Siaha tlangval chuan, "Ka tlawm hlen dawn lo a, ka tho leh dawn. Inbuatsaihna ka ṭan lehnghal ang a, October-ah Jayson hi ka hmachhawn leh ang," a ti!

NT-a hian Indian professional boxing-a fight hmuhnawm ber tia chhal ngam Jayson nen an chhawpchhuak a, inhnek buatsaihtu lamin 'rematch' nei leh turin an dawr nghal - an inhnek leh ngei dawn e.

Kristian tlangval
Dubai khawpuiah NT-a te inhnek hma hauhin fight hmuhnawm hmuh tur a awm nual a, main event-a Mizo boxer-te an inlan dawn meuh chuan boruak a sosang a, Mizo mipuiin nghakhlelin an lo thlir bawk.

Indian rapper lar Raftaar-a'n Mizo boxer tana a phuah 'NT Biakkima' tih chu Siaha tlangval hian 'entry theme' ah a rawn hmang a, India flag rawnga a lu hrengin, 'Marka 16:15' tih a inziak.

NT-a lu hrena inziak hi, "Khawvel zawng zawngah kal ula, thilsiam zawng zawng hnenah chuan Chanchinṭha hi hril rawh u" tih a ni a, Mizo tlangvalin Dubai khawpuiah Isua Krista zuitu a nihna a zahpui lo.

Siaha boxer hma hian Jayson-a'n ring a lut hmasa a, Filipino boxer pian leh NT-a aia a san zawkna ringawt en pawhin, Mizo boxer ṭantu tan rilru a zam ru!

Zam ngai lo
Round 1 aṭangin NT-a'n Jayson a nawr nghal a, Siaha boxer hian round 10 khelh kher ngai loin Filipino boxer hi knockout a tum tih a hriat a, chutihrual chuan Jayson a thiam takzet.

NT-a attacking game chu boxer tam tak tan chuan a tira talbuaina tham a ni a, mahse, Jayson erawh vawi 11 inhneka tlawm la nei lo a nihna a hriat - a buai phah lo a, rilru fim tak chungin Mizo boxer a bei let.

Kum 24 mi boxer hian ban sei zawk a nihna chu chhawr ṭangkai a tum a, a ṭul hunah a tawlh hnung hreh lo a, a inveng ṭha a, counter-attack chu innghah nan a hmang tih a lang.

NT-a'n knockout ngei tumin vawi tam a kut a lek chhuak a, mahse, Jayson-a'n movement mawi zet hmanga a lo bum ṭhin avangin Siaha boxer hian a duh anga nain Filipino boxer hi a deng fuh thei lo.

Zuam sual?
NT-a'n pumruaah a lian lo zawk tih a hrechiang a, heti chung hian Jayson lakah a ṭi eih lo - vawi tam zuang chungin Filipino boxer hi a hnek a, Jayson hian vawi tam bum mah se vawi tam a dawng bawk!

Mizo thlirna aṭang chuan attacking game kheltu leh ngamtu zawk NT-a'n hnehna a chang niin a lang a, mahse, Jayson hian a kut dahthla tawp bik loa a hnek let ṭhin avangin Zo Keite pawhin a dawng ve nual.

NT-a'n points hmanga chak ringawt a duh lo - round 10 khelh hmaa knockout ngei a duh. Hemi avang hian inhnek tawp lamah a inveng ṭha lo deuh em ni aw, tih theih a ni a, Jayson-a'n hei hi remchangah a la.

Filipino boxer hian round tawp lamah NT-a a hnek fuh nual a, chutihrual chuan Siaha boxer hian a dawh tawp bik lo - a fuh ve nual tho!

NT-a a vanduai
Round 10 an inhnek a, hun tawp dar a ri a, boxer pahnihin chak zawkah an inngai ve ve - ban phar chungin ring pawn an pan ve ve a, kawnghren nen an haw ngei dawnah an inngai.

Thin phu dep depin Mizo mipuiten result puan lai an thlir a, NT-a a tlawm a, Jayson a chak zawk - Filipino boxer biangah lawm vangin mittui a tla a, hrilhhai takin NT-a a hawi vel a, Mizo mipuiin rilru nain an thlir.

Mahse, hei hi Mizo boxer tawpna tur a ni lo. NT-a te inhnek huaihawttu, Roshan Nathanial chuan, "NT-a pawh ka sawipui tawh a, boxer pahnih hi in fight leh se ka duh," a ti a, rematch a awm ngei tur thu Vanglaini a hrilh.

Team Roshan Sports Promotion-a managing director Roshan chuan, "NT-a'n fight hmuhnawm tak a pho chhuak a, ka thlawp tlat a ni," a ti a, Mizo fighter-in a tawp a thlen theih nen buaipui chhunzawm zel a duh.

Mittui kara lawmna
NT-a'n a professional fight-ah a vawi khat nan hnehna a chang zo lo a, heti chung hian lawmna tam tak a nei. Siaha boxer chuan, "Ka team, min ṭawiawmtu NTP team te chungah lawmthu ka sawi a, Dubai Mizoten a hmunah hial rawn kalin min buaipui nasa a, ka lawm em em bawk.

"Mizo mipuite min ṭawngṭaipuina ka theihnghilh lo a, mi an lo hriat ve reng ṭhin avangin an chungah lawmthu ka sawi a ni," a ti a, amah ṭantu Mizo mipuite chungah Vanglaini kaltlangin lawmthu a sawi.

NT-a chuan inhnek thlirkirin, "Nuam ti takin inhnek ka hmachhawn a, kan inhnek kha harsa tihna pakhatmah ka nei lo. Ka zuam lutuk a, a chang chuan ka guard meuh dahthlain ka hmachhawn. Round 10 hi chu training-naah pawh ka ti fo a, ka buai phah lo. Chak ngei turah ka inngai a, mahse, chak lo zawkah min puang miau si," tiin-a result-ah a lawm loh thu Vanglaini a hrilh a, "Lalpa, ka vui lo e. Ka chak tih hi keimahin ka chiang a, rematch kan nei leh ang," a ti bawk.

IBA intercontinental champion lai NT-a hi minimumweight (47.62 kg) a inlan ṭhin boxer a ni a, WBC Asia continental title fight nei tur hian light flyweight (47.62 - 48.98 kg) ah a insawn chho a ni.

Result nei loin Dinga a lo haw!
Dubai khawpuiah Laldingliana'n fight a hmachhawn ve bawk a, mahse, Kazakhstan boxer Alimzhan Tursunov nena an inhnek chu 'no contest' ah puan a ni. Tuipui boxer hian featherweight-ah fight hi a hmachhawn a, mipuiten fight hmuhnawm tak an beisei laiin round linaah inhnek tihtawp a ṭul.

Dubai khawpuia boxer pahnih an inhmachhawn hma hian contract an ziak vek a, an contract-a a lan dan chuan organiser lamin an pek boxing glove lo chu hman phal a ni lo. Kazakhstan boxer Tursu-nov-te lam hian anmahni duhthlan glove an lo hmang ru a, hei hi organiser lamin an hriatchhuah avangin Tursunov hi an disqualify.

Tursunov hi disqualify a nih miau avangin chak lo mai tura ngaih a ni a, mahse, Dubai khawpuia inhnek phalna petu Kazakhstan Boxing Commission lamin an ram boxer an duhsak em ni chu aw, tih turin thutlukna an siam a, result hi 'no contest' ah puan a ni.

Dinga chuan a duh ang result hawn lo mah se lawmna tur tam tak a neih thu Vanglaini a hrilh a, Tuipui boxer chuan, "Pathian chungah lawmthu ka sawi a, Mizo mipui min lo ṭantute zawng zawng chungah lawmthu ka sawi takmeuh e," a ti.

Mizo boxer hmuhnawm ber pawl Dinga chuan sawi zawmin, "Engtiklai pawhin hmasawn zel ka duh - ka rawn haw ang a, ka inzir belh leh ang," a ti a, chawl hman a ni lo tih a sawi.

Duh ang takin training kan nei hman lo a, chu chu kan tuar a ni. Tun hma angin nilenga training in pek kan thei lo a, office banah training ka neihpui ve leh chauh ṭhin a, strength & nutritionist coach Biakzuala Khenglawt (Gtea) zarah kan ti thei hram zawk a ni. Kan inbuatsaihna te, training tura hun kan neih dante ka thlirin ka naute an paukhauh ka ti a, NT-a chak zawh loh chhanah dem tur an awm a nih ngat chuan keimah hi dem tur ka ni a, mawhphurhna ka la a ni. - Lalmuanpuia (Mampuia), NT-a & Dinga Coach