Argentina lakah India an chak

FIH Hockey Pro League khelh laiah Lalremsiami Hmar telna India chuan world number 2 Argentina an hneh. India tan Mizo nula Remsiami'n goal khat a khung a, hun pangngaiah 3-3 a an inhnehtawk hnuin India hi penalty shootout-ah 2-1 in an chak.

Inrinni zan inkhelah India hian Remsiami goal hmangin bul an ṭan fuh, minute lina lekah a khung. Mahse, team ṭha Argentina tan Agustina Gorzelany (22', 37', 45') chuan hattrick a siam, India goal hnih dang hi Gurjit Kaur (37', 51') khung a ni thung.

An match hmasa zawkah India hian Belgium chu an buzawlah an ngam lo, hun rei lote chhunga insiamṭhain Argentina meuh an hneh thei a, tunah chuan inrintawkna sang tak nen United States an hmachhawn leh thei dawn a ni.

Player of the Match atana thlan Remsiami chuan, "Belgium kan tum ai chuan kan khel ṭha, mimal tak pawhin hma ka sawn ve leh deuh," tiin Vanglaini a hrilh a, an khelh hmabakah theihtawp an chhuah tur thu a sawi bawk.

India hian June 21 leh 22 hian United States an hmachhawn leh dawn, an inkhelhna tur hi Rotterdam, Netherlands-ah niin zan dar 9:00-ah ve ve khelh tur a ni ang. Inkhel hi Star Sports-ah en theih a ni ṭhin.

FIH Hockey Pro League hi nikum October thla aṭanga khelh ṭan tawh kha a ni. Khawvela hmeichhe hockey thiam zual ram pakua an inel, hripui leng vangin match ṭhenkhat khelh hun sawn leh tihdanglam a awm ṭhin, ruahman dan chuan June thla hian an khel zo ang.