All Mizoram Inter Village Football draw neih a ni ta

Mizorama football inelna lian, LBS Suzuki All Mizoram Inter Village Football chu Zirtawpni zan khan Chanmari YMA Hall-ah a khuhhawnna neih a ni a, inelna sponsor-tu LBS Suzuki neitu Lalnunthara'n a kick off.

Draw hi Mizorama infiamnaa sulhnu nei ṭhaten an nei a, ISL club Hyderabad FC assistant leh technical director Thangboi Singto pawh a tel. Tun ṭum inelnaah hian team 204 zet an tel a, MPL club ten player zawnna atan an hman dawn bakah phai lam club-ten scout an rawn tir dawn bawk.

Team 204 chu
Inelna hi group panga Lammual, RG Stadium, MFA Ground (Sairang Dinthar), MZU Ground leh Lengpui Field-ah te khelh a ni dawn a, group paliah ṭhen an ni.

First round-ah hian LC team leh VC team te chu intum thei lo tura siam an ni a, seeded team erawh an awm lo. Hemi a nih avang hian round hmasa berah hian veng ṭhenawm team inhmachhawn an awm lo.

Inter Village Football-ah hian Aizawl District aṭangin team 103 an tel a, heng zinga 71 hi AMC area-a awm an ni. Mamit (26 ), Kolasib (19), Serchhip (15), Saitual (13), Champhai (8), Khawzawl (8), Lawngtlai (6), Hnahthial (3), Lunglei (2) leh Siaha (1) te an tel bawk.

Fixtures chu
Group A-ah team langsar tiha chhal tur an tam lo a, group nemna tiha sawi theih an ni. Red Ribbon Football leh CYMA Football-a champion tawh Chanmari an langsar a, Champhai Inter Village Football-a quarterfinal thleng pha Hnahlan VC bakah Hualngohmun leh Salem Veng te chu team ṭha tura ngaih an ni bawk.

Group B-ah Aizawl team ṭha Armed Veng leh Armed Veng South te an awm a, veng inṭhenawm pahnih hi an thlen san ve ve chuan last 16-ah an intum thei ang. He group-ah hian player ṭha rual awmna Durtlang bakah Bawngkawn, College Veng, Ramhlun North leh Chanmari West te an awm a, semifinal thlen phak a harsa dawn.

Group C-ah team ṭha zinga chhiar tel ziah Ramhlun South leh Lengpui bakah team ṭha tura ngaih Hnahthial Jt VC te an awm a, hming langsar vak lo thleng sang an awm pawhin a mak lo ang.

Group D hi 'group of death' tiha chhal theih an ni a, hming langsar an ṭhahnem hle. Aizawl team ṭha Chhinga Veng, Bethlehem Vengthlang, Dinthar, Electric Veng, Republic Veng, Vaivakawn leh Zemabawk North te an awm a, Aizawl pawn aṭanga team ṭha Champhai Zotlang, Melbuk leh Serchhip Jt. VC te an awm. Melbuk hi hming langsar ni lo mah se Champhai Inter Village khelh meka champion rinkai ni pha an ni a, coach langsar Lalsangzuala Hmar-in a enkawl mek.

Fixtures hi ennawn a ni leh dawn a, ground allotment a zirin thlak danglam leh theih a ni.