A zawnin Vikings an chak ta

Mizoram Super League season 7 ṭan dawn khan, fans lam thlirna aṭang chuan Chanmari Vikings thawm a lian. Mahse, an match hmasa pahnihah an tlawm, beisei ang erawh chuan inelna bul an ṭan lo.

Amaherawhchu, a zawna an tlawm hnuah a zawnin an chak ve leh ta. Inrinni zan MSL inkhel hmuhnawmah Chanmari Vikings hian Tuikual South chu 75-68 in an hneh a, match li an khelh tawh chinah table-ah pangana dinhmun an luah.

Zirtawpni zan khan R. Dengṭhuama Indoor Stadium, Mualpuiah inkhel a awm bawk. Vawi hnih champion tawh Khatla TBL chuan team thar Mission Veng Hotshots chu 85-73 in an hneh ve bawk a, inelna a nung chhungzawm zel dawn.

Vikings an harh
"A bul ṭan ṭhat hi a chanve zo ang an ni," tih a ni ṭhin. Mahse, basketball huangah erawh he thufing hi a dik lohna chen a awm ṭhin. Tun ṭuma Chanmari Vikings erawhin a takah an chantir, quarter hmasa pahniha an chungnunna chu a tawp thlengin an chhawr.

Raymond Edward Miller-a'n point 28 a neih bakah rebound vawi 17 a la, an chakna hnar a ni. Beisei phak baka season hmang ṭha Michael F. Lalawmpuia (13 points) bakah tawnhriat nei ngah Moses Zoremmawia te an langsar bawk.

Vikings coach H. Lalhruaitluanga chuan, "Tunah chuan inrintawkna kan nei leh ta, hei hi a lawmawm lai tak a ni. Match hmasa pahniha kan chak lohna lai kan siamṭha thei. Tuikual South lakah khan rinkai lo zawk ni chungin kan chak," tiin Vanglaini a hrilh.

Mission Veng Vikings a enkawl laia MSL champion tawh Hruaia hian, tun season atan erawh 'Play In' an la thlir ngam rih loh thu a sawi. June, 21 Thawhlehni zanah Khatla TBL nen an inkhel chhunzawm leh nghal ang.

Chak lo Tuikual South-in BCA an hneh ṭuma an inkhel an phak lo. Vikings lamin Darrell Bowie ven dan an thiam a, champion lai BCA laka point 45 neitu hi point 29-ah an duhtawk tir thei, an khingpui player ṭha ber an ven thiam avangin chak an phu.

TBL nge nge
Team hlun leh champion dan hresa an ni a, thawm na tak angin lang lo mah se Khatla TBL hian tualchhung basketball inelna hmachhawn dan an thiam a, team nem an ni ngai lo - a thlengsang leh ṭha zinga mi an ni ziah.

A vawi khat nana inlan Mission Veng Hotshots tan pawh TBL hi an la lian mah mah. Hotshots hian a tir lamah hma hruai zawk mah se, inkhel a tawp meuh chuan MSL hmasa pahnih champion tawh zawk hi point 12 in an sang fal hman.

Chak lo mah se Mission Veng team hian season bul an ṭan fuh an la chhawr, match nga an khelh aṭanga point riat hmuin table hmahruaitu an ni. Nilaini zanah Zarkawt BCA nen an inhmachhawn leh nghal dawn, fiahna hautak hmachhawn tura an inbuatsaih a ngai.

TBL erawhin match li aṭangin point sarih an hmu thung, an khelh hmabakah an chak a nih chuan table chung berah pawh an la inhlangkai daih thei. An player chah luh Levi Bradley Jr. an chhawr thiam zual a nih chuan champion turin theihna an nei.

MSL 7-ah hian tualchhung basketball team ṭha paruk an inel. An inkhelh kual vek hnuah a sang paliin 'Play In' an khel dawn, a hniam ber erawh division hniam zawkah an tla nghal dawn, match li an khelh tawh chinah Chawnpui chuan chak an la nei ve lo.