England-in 498 runs an siam

England-in ODI match khata run siam tam ber record anmahni siam tawh chu an khum a, June 17, Zirtawpni khan Netherlands lakah 498/4 runs siamin 232 runs-in hnehna an chang.

VRA Cricket Ground, Netherlands-ah England-in an ṭhatzia an pholang a, batter-ten run an siam tam hle. Batter pathum Jos Buttler (162*), Dawid Malan (125) leh Phil Salt (122) ten century an siam a, Liam Livingstone-a'n half century (66) a siam bawk.

England hian June 19, 2018 khan Australia lakah 481/6 runs an siam a, kum 2016 khan Sri Lanka lakah 444/3 runs an lo siam tawh bawk. ODI-a runs siam tam pathum chu Three Lions an ni.

England leh Netherlands theihna a inthlau a, mualneitu hi over 49.4-ah thi vekin 266 runs an siam ve bawk. Nimin khan ram pahnih hian ODI match thum an khelh tura pahnihna an khel leh a, result kan hre hman lo.

Three Lions captain Jos Buttler chuan, "500 thlen kan duh a, kan tlin ta lo. Engtik hunah nge 500 runs kan siam ang tih ka hre lo a, mahse 500 runs siam kan tum zel dawn," tiin a sawi.

England hian ball hnih a la awmin 500 runs siam turin 12 runs siam a ngai a, Livingstone chuan four leh six vaw chhuakin run hnihin an tum ram an thleng lo.