Mane-a'n Bayern Munich a zawm dawn ta

Liverpool chuan an club-a hlim tawh lo Sadio Mane an thlah dawn ta a, Bayern Munich-in euro maktaduai 41-a (£35.1mtd) lei an dilna chu Premier League club hian an pawm tawh - he thuziak i chhiar meuh chuan Mane hian German champion hi a zawm tawh hial mai thei.

Bayern hian Mane-a manah euro maktaduai 32(£27.4mtd) an pe phawt ang a, a bak erawh a khelh ṭhat dan a zira pek belh tur a ni thung - €6mtd chu Mane-a khelh tam dan a zira pek tur a ni a, a bak €3mtd erawh club leh mimala Mane hlawhtlin dan a zira pek belh tur a ni.

Bavarians (Bayern sawina) hian Reds hi a hmain ṭum hnih zet an lo dawr tawh a, Merseyside club-in an hnar zel hnuah an inrem thei ta - Mane hian Anfield-ah kum khat chauh cham turin contract a nei tawh a, kum 30 a nih tawh bawk avangin a man hi a to thei tawh lo.

Senegalese forward hi tlarhmaa Mohamed Salah leh Roberto Firmino te nena an inkawp chu football khawvela player inkawp hmuhnawm ber pawl an tling phak a, kum 2019 khan Champions League-ah Reds hi champion puiin, kum 30 zet league-a an champion theih loh hnuah an champion pui bawk.

Kum 2016 khan Mane hian pound maktaduai 31-in Liverpool hi a zawm a, a khelh ṭhat dan a zira £2.5mtd pek tura tih a ni - kum 2022 a herchhuah meuh chuan club legend ni chungin Reds a chhuahsan dawn.

Liverpool-in a hlawh phut zat an pek theih loh avanga chhuak tur Mane hian Reds tan inelna hrang hrangah match 269 khel hmanin goal 120 zet a khungsak a, assist vawi 48 a nei bawk.

Mane hian season hman zawh takah khan Liverpool tan inelna hrang hrangah match 51 khelin goal 23 a khung a, PFA team of the year-ah a lang - ṭum li zet Anfield-a a cham chhungin a lang.

French club Metz aṭanga a professional career ṭantu Mane hian season hman zawh takah khan Carabao Cup leh FA Cup nomawi a chawi a, UEFA Super Cup leh FIFA Club World Cup-ah Reds tan a champion tawh bawk.

Liverpool hian Mane an chân dawn tih an hriat avangin Uruguay forward Darwin Nunez chu Benfica aṭangin £64mtd-in an lei tawh a, hetihlai hian Bayern hi Barcelona laka an striker chhuanvawr Robert Lewandowski chân thei dinhmunah an ding mek thung.