Nadal-a'n Wimbledon khelh a tum

Rafael Nadal chuan Wimbledon khelh a tum a, a kephah ruh hliam vanga inenkawl mek ni mah se dam hman a inbeisei. Grass court inelna lian ber hi June 27 aṭangin All England Club-ah khelh tur a ni ang.

Spanish star Nadal hian a vawi 14 nan French Open nomawi a chawi a, Grand Slam title 22-na a lak hnu hian tournament a la khel leh rih lo. Paris khawpuia inelna a hmachhawn lai pawh khan a ke hliam vangin a buai reng a ni.

Kum 36 mi Nadal chuan, "Kar hmasa khan training ka nei, ka rin ai takin ka training pangngai thei. Wimbledon khelh ngei ka duh," a ti. Ruahman dan chuan tun kar chhung hian grass court-ah exhibition match a khel ang.

Wimbledon vawi hnih champion tawh chuan sawi zawmin, "Kar khat chhung training theih chu a lawmawm hle, ka kephah hliam enkawl dan kan ti danglam a, chu chuan rah ṭha a chhuah niin ka hria," tiin a sawi.

Nadal-a'n Wimbledon a khelh hnuhnung ber chu 2019 kha niin semifinal a thleng. Hripui leng vangin 2020 khan inelna a awm thei lo, season hmasa erawh a kephah hliam vang hian Wimbledon leh US Open a khel thei lo.