Liverpool-in defender Ramsay an lalut

Premier League club lian Liverpool chuan right back ṭhangduang Calvin Ramsay chu pound maktaduai 4.2-in Aberdeen aṭangin an lalut a, a khelh ṭhat dan a zirin £2.5mtd an pek belh ang a, nakinah an hralh a nih chuan Aberdeen hian a man zat aṭangin 17.5% an chang ve leh dawn bawk.

Kum 18 mi defender hian Anfield-ah kum nga cham turin contract a ziak a, Reds-in Trent Alexander-Arnold an neih sa avangin regular player a ni nghal lo ang tih erawh thil chiangsa a ni.

Ramsay chuan, "Ka hlim takzet a, ka tan chuan duhthusam thleng dik ang mai a ni. Aberdeen tana khelh kha duhthusam thleng dik a ni a, khawvela club lian ber pawlah ka khel leh dawn ta. Ka tan chuan thil ropui tak a ni a, fan-te hnena ka theihna pholan hlan ka nghakhlel tawh hle," a ti.

Scottish rawlthar chuan Arnold leh Harvey Elliott te hmasawnna a hmuh chuan Liverpool pan tura a fuih phur thu a sawi a, Ramsay chuan, "Hmasawn zelna kawng he hmunah hian a awm tih ka hria a, Liverpool ka thlan chhan pawh a ni.

"Club lian tak a ni satliah lo a, player naupang zawkte tan chance an siam ṭhin. Pre-season squad ka zawm a, ṭha taka ka tih theih chuan first team squad-a ka tel theih loh chhan tur ka hre lo," a ti.

Scotland Under-21 international hian March 2020 khan Aberdeen tan a match hmasa ber a khel a, season hmasa khan inelna hrang hrangah match 33 khelin goal khat a khung a, assist vawi kua a nei - Scottish Football Writers Association chuan young player of the year-ah an thlang hial.

Reds hian Ramsay hmain Fulham forward Fabio Carvalho (£5mtd) leh Benfica striker Darwin Nunez (£64mtd) an lalut tawh a, tun nipuiah player dang lei belh an tum tawh lo nia sawi a ni.