Naomi Osaka a inhnukdawk

Grand Slam vawi li champion tawh Naomi Osaka chuan Wimbledon a khel dawn lo tih a sawi chiang, grass court inelna lian a hmachhawn theih loh chhan hi a keartui hliam a la dam loh vang niin a sawi.

French Open hnuah Osaka hian tournament a la khel leh lo, tun hnai khan social media lamah a insawizawi lai video a dah chhuak a, tennis atan training pangngai a la neih theih loh thu a sawi bawk.

Paris khawpuia an chak loh hnuah khan, world ranking tel lo chuan Wimbledon chu exhibition match ang chauh a nih tur thu a lo sawi tawh, hliam a lo neih bawk avangin All England Club a pan lo tur hi a mak hran lo.

Japanese star Osaka chuan, "Hun harsa karah beiseina nen hun ka hmang mek. Ni tin mai hian malsawmna ka dawnte ka chhut ṭhin a, ka tana mi ṭangkai tak takte tana malsawmna nih ve hi ka duh ṭhin.

"Inkhelh châk viau mah ila tun dinhmunah chuan ka taksa hian a la tlin lo," tiin a sawi. A dam ṭhat lai pawhin Osaka tan Wimbledon hi hmun ṭha a ni ngai lo, tun hnai a boruak nen chawlh a thlang ta zawk a ni.

Osaka hian US Open leh Australian Open nomawi vawi hnih ve ve a chawi tawh. Rilru lam harsatna bakah taksa hliam a nei a, world number 1 ni ṭhin kha tunah chuan number 43 a ni phak hram, insiamṭha leh tur chuan hun a mamawh deuh ang.