Champion zia nen Liverpool an chak

Everton laka hnehna an chan zawh loh hnuin Liverpool-in an zia tak tak an chhuah leh ta a, Nilaini zan khan an mikhual Crystal Palace chu 4-0 ngawtin an lo sawp!

Anfield-a an lenluh hmaa an league match hnuhnung paliah Palace-in goal an chhuah miah lo a, an kaltluan vanglai tak a ni. Liverpool lakah erawh an tlarhnung chu vengtu nei lo ang mai a ni a, Reds player-te nuamsain an tal. 

Liverpool tan Trent Alexander-Arnold, Mohamed Salah, Fabinho leh Sadio Mane ten goal khat ṭheuh an khung a, goal class sang tak vek a ni - Palace tan Liverpool an sang hret a ni!

Nizan inkhelah Chelsea-in Manchester City an chelh chuan Liverpool hi Premier League champion an ni fel der dawn - he thu buatsaih a nih lai hian result kan hre hman lo. 

Anfield-ah Jurgen Klopp-a'n a duh ang takin player a remkhawm thei a, tlarhmaa Mohamed Salah, Roberto Firmino leh Sadio Mane an inkawp theih avangin Palace tlarhnungin hna an ngah dawn tih a chiang nghal. 

Mahse, Liverpool forward langsar kara a hming kan hmuh hmasak ber erawh defender Trent Alexander-Arnold a ni a, Liverpool academy chhuak right back hian minute 23-naah freekick hmangin mawi zetin a pet goal. 

"Liverpool naupang, a duhthusam rama cheng ve mai ka ni," tia sawitu Arnold hian December 2016 khan Premier League-a a match hmasa ber a khel ve chauh a, heti chung hian Reds tan league goal 30 a thawk chhuak tawh!

Kum 21 mi defender hian vawi nga goal khung tawhin assist vawi 25 a nei a, Premier League-a a match hmasa ber a khelh hnuah ani aia Premier League goal thawk chhuak hnem defender an la awm lo. 

Brazilian midfielder Fabinho chu Liverpool game chawi nungtu a ni a, a khel a hmuhnawm takzet - first half tawp nan minute khat chauh a awm tawh tihah Salah goal khung tur a siamsak a, 'assist' mawi bik a ni.

 

Fabinho-a assist-ah hian a ball khawih vel mawizia leh vision neih ṭhatzia hmuh turin a awm a, khatiang taka assist duhawm kha midfielder satliah ke aṭanga chhuak chi a ni ve lo!

Minute 55-na a ni a, Fabinho hun a her chhuak. Kum 26 mi midfielder hian yard 30 chuanga hla aṭangin goal mawi bik a khung a, Palace goalkeeper Wayne Hennessey-a'n a kut a phar sei thlawn. 

Fabinho hian inkhelh chhung zawng khan vawi 93 pass a nei a, chung zinga vawi 91 chu a pass dik - tlarhma goal nawr kawngah a pui a, a laiah Palace goal nawr tur dang chattu a ni a, a khel ṭha tluan chhuak zak. 

Everton lakah Salah a inlan lo a, Palace lakah inlanin goal a khung lehnghal. Egyptian forward hian tun season-ah league match 27 khelin goal 17 a khung tling ta a, inelna hrang hrangah match 41 khelin goal 21 a khung. 

Liverpool-a a season thumna hmangtu forward hian Reds-a a season hmasa pahnihah Premier League top scorer dinhmun a luah ve ve a, Golden Boot dawng turin a dinhmun a ṭha leh ta hle - 'one season wonder' daih rei pawl 

tak a ni!

Salah hian goal a khung mai pawh a ni lo, minute 69-naa Mane goal khung tur a siamsak bawk. Mane hian tun season-ah league goal 15 a khung tling ve ta bawk a, heti zat khung tur hian match 28 a mamawh. 

Senegalese forward hian tun season inelna hrang hrangah match 40 khelin goal 19 a khung tawh bawk a, Salah leh Firmino nen Liverpool-ah an awm zel a nih chuan Reds hi hun rei tak chu goal khung lamah an mangang lo ang. 

•    Liverpool-in Palace an hneh hi tun season-a mahni muala inelna hrang hranga match 23 an khelha vawi 20 an chakna a ni a, European top five league-ah tun season-a mahni muala vawi 20 chak thei hmasa ber an ni. 

•    Jurgen Klopp-a hnuaia Liverpool-in Premier League-a an hneh ngun ber chu Crystal Palace an ni a, vawi riat an hneh tawh. 

•    Palace hian Liverpool an hmachhawn hmaa an league match hnuhnung parukah goal li an chhuah a, Anfield-a Liverpool laka an goal chhuah zat nen a inang!

•    Liverpool hian Premier League-ah a zawnin vawi 23 zet chu mahni mualah hnehna an chang ta a, match 23-ah hian goal 67 khungin an lamah goal 23 a lut thung. 

•    Liverpool hian season thum chhung chu a zawnin inelna hrang hrangah goal 100 chuang an khung ta a, 1986-87 (a zawna vawi riat) hnua an tih leh hmasak ber a ni. 

•    Mane-a'n Palace a hmachhawn hnuhnung parukah goal a khung vek a, Premier League-a team mal laka a zawna match ruk chhung goal khung thei sawmna a ni a, Liverpool player-ah chuan Mohamed Salah (v Bournemouth) hnua awmchhun a ni. 

•    Fabinho-a'n Premier League-a a match 50-na a khel a, vawi 41 a chak lamah a ṭang. Didier Drogba, Arjen Robben, Ederson (42) leh Aymeric Laporte (43)-te chu Premier League-a an match hmasa 50-a chak tam lama a tluk loh an ni.

Han ngaihtuah ve mah teh u. Zaninah hian stadium hi khat vek ta se la, mipuiten live ngeiin kan inkhel kha en ve se ka ti ngei mai! Chutihrual chuan, entu awm lo pawhin ka naute an khel 

ṭha takzet a, stadium khat tlata anmahni ṭantu awm ang maia tha thoin an khel a ni. Ka nauten rilru hrisel tak puin an inpeih reng a, min ṭantute mit hmuhah tha kan thlah lohzia an pholang a, rei tak nghah kan tum lo tih an tarlang bawk. - Jurgen Klopp, Liverpool manager

Eng chhuanlam mah siam tur a awm lo. Liverpool team khelh ṭhat kan nang fuh a ni. Min nawr reng a, engtiklai pawhin ball chan let an tum a, ball khawih 

ve turin hun min pe meuh lo a ni ber. - Roy Hodgson, Crystal Palace manager 

Liverpool ka rawn pan tirh khan Premier League nomawi chawi ka duh thu ka sawi tawh a, he khawpui hian rei tak chu league champion an lawm tawh lo a ni. Nikumah chance ṭha tak nei mah ila, City-in season an hmang ṭha em em a, champion an phu a ni. Kuminah erawh kan hun a herchhuak ve ta. - Mohamed Salah, Liverpool forward