Bagan tan East Bengal an la 'nau' hret

Kolkata derby inkhel boruak sangah ATK Mohun Bagan chuan 2-0 in East Bengal an hneh a, champion lai Bagan laka chak tur chuan Bengal an la 'nau' hret. 

Bagan tan Roy Krishna leh Manvir Singh-ten goal khat ve ve an khung a, Jeje Lalpekhlua tel lohna Red & Golds tlarhma a hriam tawk loh avangin si phurh an sut thei lo. 

Inrinni zan khan Bengaluru FC an inlan a, Bangalore club hian an hneh tura ngaih Hyderabad FC chu goal khung loin an inhnehtawkpui.

Kolkata derby a nih chuan boruak a 'hot' ṭhin a, hetihrual hian entu an awm theih loh avangin season danga derby boruak 'hot' na erawh a phak lo. 

East Bengal coach Robbie Fowler-a'n fimkhur takin 4-2-3-1 a hmang a, mahse 100% fit loh vangin tlarhmaah Jeje Lalpekhlua chhawr theih a ni lo a, defender Lalramchullova chu hliam vangin December thleng a inlan thei dawn lo bawk. 

Inkhel a hmuhnawm tawk lo a, East Bengal hi thla khat pawh an la awm ho hman lo a, player an la inman tawk lo niin a lang. 

Team pahnih dang-lamna chu player an inhriatchian hleih hi a ni a, East Bengal lam an la training ho tlem laiin Bagan erawh ram pawn player pawh season hmasaa ATK hming chawia ISL-a lo champion ho tawh an ni. 

Minute 29-naah striker chhuanvawr Roy Krishna chuan an phu ang ngeiin goal hmahruai a khung a, minute 85-naah Manvir Singh chuan ṭha zetin a khung ve bawk - Punjabi striker hian mual sir aṭanga ball lalutin goal hi a khung a, goal ṭha bik a ni. 

East Bengal tan Irish midfielder Anthony Pilkington chu player hmuhnawm bik a ni a, Red & Golds coach Robbie Fowler chuan, "Kan la awm ho tam lo a, kan ṭha chho zel ang," tiin a êng zawngin a thlir. 

Bengaluru-in an beisei ang result an la hmu thei lo a, an match hmasa berah 2-0 a FC Goa laka hma an hruai reng hnuin si phurh an sut zawh tir a, an hneh tura ngaih Hyderabad chu 0-0 in Inrinni zan khan an inhnehtawkpui leh ta. 

Bengaluru-in bench-ah goalkeeper Lalthuammawia Ralte an dah tih loh chu Mizo player squad-ah an dah lo a, Hyderabad lamah R. Laldanmawia chuan bench lamah hun a hmang tluan bawk. 

Zanin ISL-ah inkhel pakhat a awm dawn a, Mizo awm lohna Goa chuan NorthEast United an mikhual dawn. Highlander tan Lalengmawia (Apuia) leh Lalrempuia Fanai-te chu player pawimawh an ni phak a, Lalkhawpuimawia leh Rochharzela-ten quarantine vangin match khelh an la nei lo thung.