Lazio leh Inter ten point an hloh Juventus tan nomawi a hnai leh ta

Italian Serie A champion ni turin Juventus tan kawng a in hawng zau leh tawh hle. Nilaini zan khan pahnihna Laizo leh Inter Milan ten point an hloh ve ve a, khelh zat inangah Juve chuan point liin hma an hruai fal - match khelh hmabak 11 an la nei.

Atalanta-in goal hnih an chhuah hmasak hnuah an mikhual Lazio chu 3-2 in an lehthal a, an huaisen rah sengin point thum hlu tak an sual chhuak. Inter Milan chuan an mikhual Sassuolo chu 2-2 in an inhnehtawkpui ve thung.

Champion lai Old Lady chuan zanin dar 1:15 hian tlak hlauhthawnawma awm lai Lecce an mikhual dawn, hnehna an chang a nih chuan a zawna season kua league champion nih an tumna chu an hnaih leh sawt ang. Season tawp lamah erawh team lian lo zawka ngaih lakah hian chetsual ve theih a ni.

Nikum tawp lam aṭangin Lazio an khel ṭha tluang a, inelna hrang hrangah match 21 chhung chu tlawm nei loin an kaltluang, club record thar an siam hial. Mahse, tunah chuan an kaltlang lai hi a tawp, league nomawi an beiseina erawh a la tawp bik lo.

Inkhel ṭan aṭanga minute ngana lekah Atalanta midfielder Marten de Roon-a'n anmahni lamah a ti lut a, mikhual lamin Sergej Milinkovic-Savic hmangin minute 11-naah an goal hnihna an khung zui nghal - nuamsa taka chak thei tura ngaih an ni.

Mahse, team huaisen Atalanta an zam lo. Second half-ah Robin Gosens (38'), Ruslan Malinovskiy (66') leh Jose Luis Palomino (80') te hmangin an chhanglet. Serie A season kal laia club goal khung hnem ber Atalanta (77 goals) hi nikum ang bawkin team lian tana zuam sual theih an ni tih a la chiang reng.

Simone Inzaghi naute tan result ṭha lo a ni. Nikum September 25 khan Inter Milan 1-0 in an hneh lo a, chumi hnuah chuan tun ṭum hi league match bika an chak loh lehna hmasa ber a ni. Khelh hmabak 11 an la neih avangin Juve umphak turin hun a la awm, chutihrualin an chunga mi an chetsual hun an chan a ngai dawn.

Antonio Conte-a'n kan khelh hmabak zawng zawng chu 'Final' vek a ni tawh tiin sawi mah se Inter Milan an chak zo chuang lo. Inter tan hian Romelu Lukaku, Cristian Biraghi leh Borja Valero ten an khung; mikhual lamin Francesco Caputo, Domenico Berardi leh Giangiacomo Magnani te hmangin an khung thung a ni.

Italian manager Conte-a'n Premier League lama a hriat chian player panga a chhawr. Striker Lukaku-a'n penalty a khung a, a goal pakhat erawh offside vanga pawm a ni lo. forward Alexis Sanchez chuan beisei a phak lo a, Victor Moses ang bawka mual sira awm substitute Ashley Young chuan penalty a chawi thung.

San Siro-a inkhel ni mah se Inter Milan lamin ball an chang tlem zawk, hun tawp dawnah defender Milan Skriniar chu yellow card pahnihna hmuh vangin hnawhchhuah a ni a, tho chhuak tur an awm tawh bik lo. Champion ai chuan season thara Champions League khelh ngei an tum ang.

Kum 50 mi Conte chuan, "Tihsual ngah lutuk hi chuan a tawpah kan tuar leh ṭhin. Tun match bikah pawh holam taka tihsual kan neih hnem avangin a lawmawm loh hle, khelh hmabak dang zawngah chuan hnehna chan kan tum ang," a ti.