Aizawl FC kalkawngah Bengaluru FC
I League khelh hun a inher chhuak leh ta. India ram football club inelna sang bera hmahruai mektu chu Aizawl FC an ni. Mizo club hian Pathianni tlai dar 4:25 hian champion lai Bengaluru FC an lenchilh ang. Darkar hnih leh a chanve hnuah Kolkata Derby khelh a ni dawn a, Mohun Bagan leh East Bengal te hi pakhatna ni tura AFC elpuite an ni.
Ban phakah nomawi
Aizawl FC-in anmahni hnaih bertu East Bengal aiin head to head an nei ṭha zawk a, match li khelh hmabak aṭanga vawi thum an chak chuan an champion chiang. Mizo club khelh hmabak chu Bengaluru FC, Churchill Brothers, Mohun Bagan leh Shillong Lajong te an ni.
Khalid Jamil-a hote hmabak hi hna harsa tak ni mah se thil theih a ni a, Kolkata Derby hian AFC tan nomawi kawng a hawn zau sak thei bawk. Mohun Bagan leh East Bengal te hi Kanchenjunga Stadium-a an intawn hmasak zawhah goal awm loin an inhnehtawk a, hetah hian tawp mai loin inkhel boruak sang tak zawhah Kolkata club pahnih hian result ṭha neih an harsat chhunzawm a, hei hi tun ṭumah pawh thleng nawn thei a ni.
East Bengal hian Bagan bakah DSK Shivajians, Minerva Punjab leh Mumbai FC te an la hmachhawn dawn. Mariners hian international break zawhah Bengaluru 3-0 in an sawp tawh a, Kolkata Derby zawhah hian Shillong Lajong, Minerva Punjab, Aizawl FC leh Chenai City an khelhpui leh bawk ang.
An intluk tawk
Aizawl FC-in I League an khelh hmasak ber season-ah Bengaluru FC hi ṭum hnih an hmachhawn a, an hneh lo ve ve.
Blues-in Aizawl an tlawh hmasak ber ṭum kha Mizorama I League khelh hmasak ber ṭum a ni a, RG Stadium khat tlat mipui an pungkhawm. Khami ṭum khan Mizo club-in India club an tluk thei tih a takin lang mah se Osano Curtis goal hmangin mikhual an chak.
Aizawl FC hian Kanteerava Stadium an tlawh hmasak ber ṭumin Bangalore-a Mizo awmten AFC an ṭawiawm ṭha a, Blues khelmualah Mizo club an tlangnel hle. Amaherawhchu Aizawl FC tawnhriat neih tlemna a lang a, CK Vineeth-a goal chu team pahnih danglamna a ni.
Mizo club hian Bengaluru FC-in I League nomawi an chawi theih nan kawng an sial sak a, Mohun Bagan an hneh sak. Ashley Westwood-a hnuaia Blues-in nomawi vawi hnih an chawi theih nan Aizawl FC an thawh hlawk hle.
Federation Cup-ah Mizo club-in phuba an la a, first round-ah I League champion Blues chu an pet chhuak nghal. Aizawl FC hian RG Stadium leh Kanteerava Stadium ah hnehna an chang ve ve a, vannei an ni lo.
Tun season-ah Aizawl FC-in I League tawnhriat nei ṭha coach Khalid Jamil an nei a, Bengaluru FC erawhin club ropui Barcelona assistant coach hial ni tawh Albert Roca an lalut thung.
Aizawl FC-ah Spanish coach Manuel Retamero a hlawhtlin loh ang bawkin Bengaluru FC-ah Spanish coach Albert Roca a hlawhchham. Champion lai Blues hian RG Stadium-ah Aizawl FC draw thei mah se match li khelh hmabak la awmah champion nawn an inbeisei tawh lo.
Bengaluru FC hian nomawi beisei lo mah se season liam taa anmahni duhsaktu Aizawl FC duat let ai chuan hneh an duh dawn a, India captain Sunil Chettri baka India ram player ṭha awmna club hi Mizo club tan chetsual theihna a ni.
An kim ta
Aizawl FC-in an match hnuhnung berah hrem vangin defender pawimawh Eze Kingsley bakah inhliam vangin Lalruatthara te an chhawr thei lo a, Minerva Punjab nen 2-2 in an inhnehtawk.
Bengaluru nen erawh Nigerian defender Kingsley leh Hmunhmelṭha tlangval Ruatthara te an dam tawh a, coach Khalid-a chhawr theih turin player an dam kim bawk.
Aizawl FC player zingah ram tana khel tura koh an awm lo a, hahdamna hun ṭha an neih hi Blues hmaa an chungnun theihna remchang a ni.
Fixtures
Vawiin Inkhel Tur
4:35 PM Minerva Punjab Vs Chennai City
7:05 PM DSK Shivajians Vs Shillong Lajong
7:05 PM Mumbai FC Vs Churchill Brothers
April 9, Pathianni
4:35 PM Bengaluru FC Vs Aizawl FC
7:05 PM Mohun Bagan Vs East Bengal