Zonet leh MISMA an inrem

Nimin khan Zonet Cable TV leh Mixed Martial Arts Association (MISMA) te chuan Zonet Office, Zarkawt-ah inremna an siam. Zonet aiawhin manager Lalnunpuia chuan hming a ziak a, MISMA president Lalṭhakima'n hming a ziah hnan bawk.

MISMA hi All India Mixed Martial Arts Association leh Mizoram Firms and Societies hnuaiah an inziak lut a, Mixed Martial Arts discipline hrang hrangah inkaihhruaina dan leh inelna zawng zawng kengkawhtu a ni.

Inremna chu

MISMA leh Zonet chuan MMA tournament 'Mizoram Fight League (MFL) Season 1 buatsaih turin inremna an ziak a, an ruahhmanna an puang zar nghal bawk.

MFL Season 1 inelna atana sum mamawh zawng zawng chu MISMA-in an ngaihtuah ang a, ticket sales aṭanga sum hmuh zawng zawng a dawng bawk ang.

Zonet chuan MFL Season 1-ah hian Television Rights a nei ang a, MFL1 hi live-in a pe chhuak ang a, MFL leh a kaihhnawih a tam thei ang ber a pe chhuak bawk ang. Zonet phalna leh hriatpuina loin MFL1 leh a kaihhnawih TV-ah tihchhuah phal a ni dawn lo thung.

MFL1 atana technical kaihhnawih zawng zawng chu MISMA kutah a awm ang a, Zonet lamin inelna neihna hmun tur a ngaihtuah thung ang.

Inelna neih hun chungchangah MISMA leh Zonet te an inrawn tawn dawn a, a hun tihchian a la ni lo. Internet service provider Netsurf-in MFL1 ṭan hunah LIVE Streaming-in a pek chhuak ang.