Champion lai TBL an tho

Khatla TBL-in Mizoram Super League Season 3-a Zarkawt BCA laka an mualpho hnuah Zarkawt club pakhat zawk Serpents chu Ningani zan khan 80-64 in an sawp.

MSL hmasa pahniha champion TBL hian a lungthu kim nan season thumnaah pawh champion an tum tih lantirin India player Garry Gill pui turin ONGC thiampuipa Vishesh Bhriguvanshi leh American player Chris Solomon an lakluh belh a, team ṭha ber zinga chhiar tel theih an ni leh ta.

Khatla TBL hian quarter khatnaah 25-9 in Serpents lakah hma an hruai nghal a, chak tur zawk a chiang nghal der tawh. Serpents-in Garry Gill (20 pts) bakah Simon H. Lalremruata (6 pts) te chu dan harsa an ti a, Chris Solomon (10 pts) pawhin theihna a nei sang tih a lantir bawk.

Second quarter aṭang­in Vishesh-a'n (13 pts) India ram basketball a thunun theihna chhan a rawn lantir leh a, Federation Cup-a ONGC champion puitu leh MVP ni bawk Vishesh-a'n talbuai hmel a pu ngai lo - a kut hnu mam ṭha tak chu thlirtu mipui tan mit ti tlai tham a ni.

Hun chanve hnu lamah Serpents an insiam ṭha a, point 18 neitu Lal­thankhuma chet ṭhatna e­rawh an mualpho tur hliah khuhna chauh a ni. Champion lai TBL erawhin Serpents hma­chhawn tura an player ziah luh 12 te chu khelhna hun ṭha an pe vek a, MSL3-a player zawng zawng point nei thei hmasa ber an ni.