Nitin training ka nei - Mary Kom

MC Mary Kom chuan inkharkhip karah pawh nitin boxing training a la neih ziah thu a sawi a, harsatna karah pawh beiseina nung a la neih reng thu a sawi bawk.

India boxer chhuanvawr hi kum 37 mi a ni tawh a, fa pathum a nei tawh bawk. Tokyo Olympic khel turin a tling chiang tawh, infiamna khawmpui lian hi kumina neih tur ni mah se coronavirus vangin nakkum atan sawi a ni.

World champion vawi nga ni tawh Mary Kom chuan tunlai a hun hman dan sawiin, "Inah hna pawimawh leh ṭul apiang ka thawk a, ka pasal leh fate ei tur ka siamsak. Chhungkua in kan inti hlim a, chumi kar lakah chuan boxing training pawh ka nei ziah.

"Hripui hetiang taka a leng hi keini chuan kan la hmachhawn ngai lo a, eng tianga lo dawnsawn tur nge tih pawh hriat a harsa hle. Mi ṭhenkhat tan chuan khawsak a harsat phah viau ang tih chu ka ring, theih ang tawka kan inpuih tawn chu a ngai," a ti.

Olympic chungchang sawi zuiin Manipuri boxer chuan, "Hma hun hi sawi lawk thiam a harsa, tunah chuan 2021 hi ka suangtuah theih chin a ni rih. Tokyo Olympic ṭha taka khelh phawt ka duh a, chumi hnuah thil dang chu ka ngaihtuah chauh ang," tiin a sawi.