Champhaia roreltu Zotlang

Champhai district huam chhunga football thiam ber veng/khua zawnna chu chhanin a awm - Zotlang an thiam ber. Nimina Rii & Hawla Inter Village Football Tournament final-ah Zotlang hian Hnahlan chu 2-1 in an hneh.

Chhangphut Field-a inkhelah hian Hnahlan-in Lalramkima hmangin hma hruai mah se Zotlang-in Lalhmuchhuaka hmanga an sut hnuah Jeru-a'n chakna goal a khung.

Zotlang striker Chhuaka'n final-ah tun inelnaa a goal rukna a khung a, top scorer a ni. Hnahlan-in fair play award an dawng a, captain PC Lalhuapzauva chu best player a thlan a ni bawk.

Final chu

Zotlang lamin inkhel bul ṭan ṭha mah se Hnahlan-in goal an khung hmasa zawk a, Chanmari West FC player hlui Zaremsiama Chhangte thawhrah chu Lalramkima'n yard ruk lek aṭangin a pet goal.

Hnahlan-in goal an khung hnuah team pahnih an inhnehtawk a, amaherawhchu minute 10 hnuah Zotlangin an sut. Vei lam aṭanga a ball vawrhluh chu Hnahlan keeper Lalnunpuia'n a khawih hmain Chhuaka'n siphurh sutna leh top scorer nih nan a tauh lut.

Team pahnih an inhnehtawk a, minute 78-naah Zotlang substitute Zothanpuia ball pek chu Chhuaka'n a kawppui siam sak nan hmangin Jeru-a'n chakna goal a khung.

Rii & Hawla Football vawi 15-naah Zotlang chu a vawi khat nan an champion a, nikuma final an luh hnuah Dinthar FC coach hlui Lalrintluanga (Saitea) kaihhruaina hnuaiah an champion.

Inelna Thlirna Tawi
Zotlang 2-1 Hnatlan
ZOT : Lalhmuchhuaka 29'; Jeru 78'
HNA : Lalramkima 19'
Champion Zotlang Rs 1,00,000
Runner Up Hnahlan Rs 50,000
Fair Play Hnahlan Rs 10,000
Best Player PC Lalhuapzauva
Top Scorer Lalhmuchhuaka (Goal 6)