A sang ber dawttu Sindhu

Badminton World Federation (BWF)-in ranking a tih chhuah thar berah Pusarla Venkata Sindhu chu number 2 a ni ta. Indian shuttler hi pangana aṭangin pahnihnaah a invawrh chho a, ranking a neih ve chinah a tawn san ber ṭum a ni.

Kum 21-a upa Sindhu hi nikum khan Rio Olympic-ah India aiawha inlanin gold medal match a thleng a, final-ah erawh Carolina Marin hneh loin silver medal a dawng. Indian shuttler zingah Olympic a silver medal la thei hmasa ber a ni hial.

Hyderabad nula hian nikum December thla khan a vawi khat nan Dubai Masters a khel a, champion lo mah se he inelnaah hian Olympic-a a hneh loh Marin hi a hneh. Kar hmasa lawk khan India Open Superseries final-ah Spanish shuttler Marin bawk hi hneh lehin a champion - India nula hian ranking-a pahnihna nih hi a phu.

Arjuna awardee Sindhu-i pa PV Ramana chuan, "Hetiang dinhmun a thleng ve hi a lawmawm takzet. Amah mai bakah hlawhtlinna a chan theih nana tha thawhtu zawng zawngte thawhrim vang a ni. Sindhu hian enge a hmalam hunah a tih tur a hre chiang a, nasa leh rim leh zualin a beih a ngai ang," tiin a sawi.

BWF ranking hi che reng a ni a, tournament pahnih khat khelh fuh loh chuan tlak hniam leh nghal mai theih a nih avangin Ramana hian a fanu chu thawkrim chhunzawm turih a duh hle tih a lang.

Tunge Sindhu?

July 5, 1995 khan Hyderabad, Telangana-ah Sindhu hi a lo piang a, a nu leh pa te hi volleyball player hlui an ni. A pa PV Ramana hian infiammi hmingṭha chawimawina Arjuna Award pawh a lo dawng tawh.

Badminton a khelh ṭanna tak chu Indian Railway Institute of Signal Engineering and Telecommunications, Secunderabad ni mah se khaweval hriat tura chher chhuaktu erawh Pullela Gopichand a ni. Gopichand Badminton Academy-ah inzir chhunzawmin, India rama badminton player ṭha zawng zawng deuhthawin an pan he academy-ah hian tun thlengin a la awm.

A naupan lai aṭangin sulhnu ṭha a nei chho thei nghal a, 2012 Asian Junior Championship leh 2011 Commonwealth Youth Game-ah te khan gold medal a lo dawng tawh. Senior level-ah pawh World Championship (2013, 2014) leh Asian Games (2014)-ah te bronze medal a lo la tawh bawk.

Number 9 Saina

Kum 2012 August 4 a ni a, London-ah Saina Nehwal leh Wang Xin te chu Olympic bronze medal inchuhin an inkhel. Chinese shuttler hi hliam vanga a inkhelh zui theih tak loh avangin Saina hi 18-21, 0-1 a chak zawka puan a ni. India badminton player zingah Saina hi Olympic-a medal la hmasa ber a ni a, nikum khan Sindhu-i'n a hnung a rawn zui.

Hyderabad shuttler hian China Open Super Series leh Malaysia Masters-ah te hlawhtlinna chan chhunzawmin Hong Kong Super Series-ah pahnihna a ni bawk. Kum 2015 April, 2 a thlen meuh chuan Saina hi world number 1 a ni! India nula zingah BWF ranking-a a chung ber luah thei hmasa ber a ni.

Tun hnaiah Saina hian beisei a phak lo. Nikum Rio Olympic-ah khan inlan ve bawk mah se a khup hliam vangin medal dawng thei dinhmunah pawh a ding lo. A hliam zai a nih hnuah pawh duhthusamin a la khel chhuak leh rih lo. India Open quarterfinal-ah Sindhu a hneh lo a, Malaysia Open-ah a match hmasa berah a tla nghal bawk - ranking chhuak thar berah pakuana a ni.