Kan beidawng ngai lo - Pochettino

Tottenham manager Mauricio Pochettino chuan hamrik hnuhnung ber a rik hma chu tha thlah loin an beih ṭhin thu a sawi a, Premier League nomawi chawi an tumna kawngah pawh an beidawn ngai loh thu a sawi tel bawk.

Zanin tlai dar 5:00-ah Spurs hian White Hart Lane-ah Watford an lo mikhual dawn a, anmahni aia point sariha sang zawk Chelsea nena an inkar tih zim theihna hun a ni dawn. Pochettino-a naute hian point thum an hmu a nih chuan zan dar 10:00-a Bournemouth tlawh tur Blues tan boruak a sang sawt dawn tihna a ni.

Tottenham hian Nilaini zan khan Swansea City 3-1 in an luhchhuah. Spurs hi khualmualah minute 87 thleng sikhat faiin an chak lo - hun tawp hma minute hnih lekah Dele Alli-a'n an si phurh sutin injury time-ah Son Heung-min leh Christian Eriksen ten an khung belh bawk.

Spurs manager Poch chuan, "Tun hnai kum 10 chhungin Chelsea leh Tottenham in khaikhin a nih chuan Blues hian nomawi an chawi hnem zawk ngei mai. Mahse, keini pawh hian hlawhtling turin huaisenna kan nei a, tunah hian rinna kan neih san bakah kan beidawng lo - engtiklai pawhin kan nawr zel dawn," a ti.

North London club tan hian Son Heung-min chuan inkhel bul a ṭan leh ngei rin a ni a, dam loh vangin keeper Hugo Lloris chu a inlan theih a la beisei awm loh. Victor Wanyama chu inkhel tura a inpeih tawh laiin Harry Kane leh Danny Rose te hliam a la dam lo thung.

Tottenham-in a zawnin league match li chhung hnehna an chang tawh a, hmahruaitu Chelsea chu Crystal Palace lakah an lo chetsual hlauh avangin an inkar a zim sawt - Blues hi Manchester City lakah 2-1 in an tho chhuak leh tawh. Antonio Conte tan a season khatnaa league nomawi chawi turin inkhelh hmabak pariat awm aṭangin point 18 bak hmuh belh a ngai tawh lo.

Manchester City manager Pep Guardiola-a'n Blues an hneh loh hnuah, "Tunah chuan Chelsea leh Tottenham inkar a ni tawh," tiin league nomawi chawi turin club pahnih bakin beisei an neih tawh loh thu a sawi.

Barcelona leh Bayern Munich manager hlui hian Premier League beisei tawh lo mah se season thara Champions League khel turin point a mamawh, zanin dar 7:30 hian Hull City an lo mikhual ang.

Fixtures
Zanin Inkhel Tur
Tottenham Hotspur 5:00 PM Watford
Manchester City 7:30 PM Hull City
Middlesbrough 7:30 PM Burnley
Stoke City 7:30 PM Liverpool
West Brom 7:30 PM Southampton
West Ham 7:30 PM Swansea City
Bournemouth 10:00 PM Chelsea
Pathianni zan
Sunderland 6:00 PM Manchester United
Everton 8:30 PM Leicester City
Thawhṭanni zan
Crystal Palace 12:30 AM Arsenal