Madrid Derby khelh hun a thleng ta
La Liga-ah Real Madrid-in hma an hruai mek a, tun season-ah an champion a nih chuan kum nga hnua league nomawi an chawi leh hmasak ber a ni ang - mah se league match kua khelh an la hmabakah chuti maiin kalkawng a awlsam dawn lo. Zanin dar 7:45-ah Madrid Derby khel turin Atletico Madrid an mikhual dawn.
Sevilla laka 3-0 a hnehna chang hlim Barcelona an inlan dawn bawk a, Catalan club hian zanin dar 12:15-ah Malaga an lenchilh ang.
Tu nge ṭha zawk?
Players man zat aṭanga chhut ni se Real Madrid hi team ṭha zawk tia chhal tur an ni a, tun hnaia an khelh dan aṭanga chhut a nih erawh chuan chungnung zawk an awm lo. Real Madrid-in an match hnuhnung parukah hnehna an chang vek a, Atletico laka hlauthawng tur an ni lo.
Atletico Madrid-in tawlhthluk zeuh an chin avangin season ṭantira champion sawi ri ngam club hian Champions League khelh chu an tum ber a ni tawh a, tun hnaia an harhtharna erawh hmuh hmaih a thiang lo - an match hnuhnung parukah goal khat chiah an chhuah a, tlarhma nei ṭha Real laka an goal venhim dan tur hi hmuh chakawm chu a ni.
Tu nge inlan dawn?
Real Madrid coach Zinedine Zidane-a'n an match hnuhnung bera Leganes an hneh ṭumin Madrid derby khelh tur a thlir lawk a, Cristiano Ronaldo, Gareth Bale, Karim Benzema leh Toni Kroos-te a chawlh hahdamtir - zaninah a naute lak aṭangin beisei a nei ang.
Atletico Madrid coach Diego Simeone-a'n Madrid derby a theinghilh bik lo. An match hnuhnung bera Real Sociedad an hneh ṭuma inkhel bul ṭantute chu ni khat chawlh hahdam hun a pe! Atletico player langsar zingah Kevin Gameiro chu hliam vangin a inlan theih a la beisei awm loh a, tun hnaiah Fernando Torres a khelh ṭhat avangin Simeone-a tan buaina tur erawh niin a lang lo.
Sulhnu
Madrid khaw club te hi vawi 56 an inhmachhawn tawhah Real-in vawi 33 hnehna chang tawhin an chungnung zawk a, tun season-a an intawn hmasakah Ronaldo hattrick chhawr ṭangkaiin 3-0 in hnehna an chang bawk - inchhuang lutuk tur erawh an ni lo. Santiago Bernabeu-a Atletico an len hnuhnung match thumah Simeone-a nauten hnehna an chang vek!
Atletico tlarhnung tan Ronaldo ven uluk a ṭul dawn. Portuguese forward hian Atletico lakah goal 18 ngawt a khung tawh. Real tlarhnungin Sergio Ramos hoin hna an ngah ve dawn tho - Atletico in a league match hnuhnung paruka goal nga khung tawh Antoine Griezmann an nei tlat.
Boruak sang
Atletico rawlthar duhawm Saul Niguez chuan, "Keini chuan Madrid derby hi final ang maiin kan thlir a, Santiago Bernabeu-a kan result neih ṭhin ang tho kan neih ka beisei," tiin Real khelmuala an tlangnel ṭhin thu a sawi lang zauh.
Digeo Simeone-a'n an match hnuhnung bera Real Sociedad an hneh ṭuma fan-te a auhna chu, "Real fans ang mai in ni, in ngawi ṭhuap mai. Ṭang ta che u," tih hi a ni a, zaninah Bernabeu-ah auh elna a dawng nual a nih pawhin a mak lo ang.
A tawp kharna chu hei hi a ni - Real in Barcelona an la hmachhawn leh dawn avangin champion an tum a nih chuan zaninah chak ngei an mamawh.
Fixtures
Espanyol 4:30 PM Deportivo Alavés
Real Madrid 7:45 PM Atlético Madrid
Sevilla 10:00 PM Deportivo La Coruna
Málaga 12:15 AM Barcelona
April 9, Pathianni
Granada 3:30 PM Valencia
Celta de Vigo 7:45 PM Eibar
Osasuna 10:00 PM Leganés
Las Palmas 12:15 AM Real Betis
April 10, Thawhtanni
Real Sociedad 12:15 AM Sporting Gijón