Chong Wei a kal zel

Lee Chong Wei chuan Hu Yun hnehin Malaysia Open badminton championship quarterfinal a lut. Sarawak Indoor Sta­dium-a inkhelah khawtual tlangval Chong Wei hian minute 27 chhung lekin Hong Kong tlangval lakah hian 21-8, 21-6 in hnehna a chang.

Mipa singles inkhel dangah Olympic champion vawi hnih ni tawh Lin Dan chuan Tanongsak Saensomboonsuk 21-8, 21-13 in a hneh. Chong Wei leh Lin Dan te hian Malaysia Open title lak an duh vangin kar hmasa a khelh zawh tak India Open an khel lo.

Hmeichhe lamah world number 1 Tai Tzu Ying-i'n Pai Yu Po chu 21-6, 21-8 in a hneh a, Rio Olympic gold medalist Carolina Marin chuan 21-14, 21-18 in Nicthaon Jindapol a hneh ve bawk.