Chinese GP a buai

Tun season-a Formula 1 intlansiak pahnihna tur Chinese Grand Prix chu Pathianni chawhma dar 11:30-ah tlan a ni dawn, nimin khan practice vawi hnihna neih niin chhum a zin nasat bakah ruah a sur bawk avangin practice hi ṭhulh a ni.

F1 race director Charlie Whiting chuan, "Shanghai-ah chhum a zin nasat em avangin helicopter tan ṭum ngaihna a awm lo, inhliam awm palh ta se damdawi in pan turin harsatna kan nei dawn. Intihpalh hlauhthawn thuah practice hi neih luih chiah kan ngai lo," a ti.

Driver inhliam awm palh ta se helicopter a thlawh theih loh avangin motor hman a ngai dawn a, tlankawng aṭanga damdawi in hnai ber thleng turin minute 20 vel zet a ngai.

Chinese GP tlanna tur Shanghai International Circuit hi 5.451km a thui a ni a, vawi 56 an tlan kual ang, kumin hi vawi 14 an neihna tur a ni.