Mumbai ngam loh Steven Smith
Indian Premier League khelh mekah batsman an lansarh chhunzawm zel - Ningani zan khan Rising Pune Supergiants batsman Steven Smith chuan run 84 ngawt a vaw chhuak a, Mumbai Indians lakah a team hi wicket sarih ngawtin hnehna a chanpui.
Pune khawpuia inkhelah Mumbai an bat hmasa zawk a, over 20-ah wicket riat hlohin run 184 an vaw chhuak. Captain Rohit Sharma berin run thum chiah siama a out avangin MI batsman zingah khel ṭha tia sawi tur an awm lo a, ball 15-a hmachhawna run 35 siam chunga a tawp thleng dam Hardik Pandya leh Jos Buttler (38 runs) chu khel ṭha tia sawi ngam awmchhun an ni.
Rising Pune bat hun a thleng a, opener Ajinkya Rahane-a'n ball 34 a hmachhawnah run 60 siam nghalin bul an ṭan
ṭha hle. Rahane dinpuitu Mayank Agarwal chu run ruk lek siamin out nghal mah se captain Steven Smith-a'n hruaitu ṭha a nihzia pholangin ball 54 lek a hmachhawnah run 84 ngawt a vaw chhuak a, a tawp thleng a dam - Mumbai-in Sri Lanka tan a inlan vanga squad la zawm thei lo Lasith Malinga an ngai khawp ang. Sri Lankan bowler hian T20-a Bangladesh nen an inkhelah a team hnehna chanpui zo lo mah se hattrick a siam a, Mushfiqur Rahim, Mashrafe Mortaza leh Mehedi Hasan te a zawnin a vawm out vek.
Pune hian over 19.5-ah run 187 siamin wicket thum chiah an hloh a, IPL-a an match hmasa berah an khel ṭha hle.