Verstappen hmahruaina a sang fal zel

Formula 1 champion lai Max Verstappen chuan season kal laiah hma a hruai fal zel. Pathianni zana tlan zawh tak Canadian Grand Prix-ah Red Bull driver hian hnehna a chang a, kumina vawi ruk a chakna a ni.

Dutch tlangval hian a tir aṭangin hma a hruai, safety car luh hnu leh intlansiak tawp lamah Carlos Sainz-a'n na takin nawr buai mah se, a tawpah second 0.9 lekin a thleng hmasa zawk a, second khat pawh tling lo mah se pakhatna nih nan a tawk.

Max hian point 175 hmuin a chung berah a awm, pahnihna chu amah ang bawka Red Bull car khalhtu Sergio Perez (129 points) a awm thung. Vawi sarih champion tawh Lewis Hamilton chu paruknaah a la awm thung.

F1 hi chawlhkar hnih chhung an chawl lailawk dawn. Chumi hnuah chuan Silverstone tlankawngah British Grand Prix an tlan dawn, season hmangṭha Red Bull elphak turin Mercedes tan insiamremna hun a ni dawn.

Hnehna chu
Canadian Grand Prix hi tun hma chuan Verstappen tan hmun ṭha a ni ngai lo, tun hma lama a inlan tawhah chak a la nei miah lo. F1 intlansiak vawi 150 a hmachhawn tlin nan a hmang a, a tlan ṭhat bakah a elpui dangte chet ṭhat tawk loh karah a vannei.

Tun season bika car nei chak ber Ferrari chu tun hnaiah an che fuh lo, engine chiang lo vanga vawi hnih an chetsual vangin Italian team an insiam ṭha a, danin a phal aia thuia an chet a ngaih avangin Charles Leclerc chuan a hnung ber aṭangin intlansiak bul a ṭan.

Ferrari driver Leclerc hian nasa taka bei letin pangana dinhmun chu a luah phak, amaherawhchu amah aia driver hriam leh huaisen zawk Max-a meuh umphak tur chuan a theihnain a tlin bik lo, dawhsan (podium) lawn phak lo mah se a dinhmuna lawm tur erawh a ni.

Circuit Gilles Villeneuve, Montreal hi Hamilton tan hmun duhawm a ni, vawi sarih chak tawhin Michael Schumacher nen record an nei ṭha ber. Pathianni zana entu mipui 338,000 teh meuh pungkhawm pawhin Britain tlangval hi an au phur nasa hle.

Amaherawhchu, season hmasa intlansiak hnuhnung bera a chet fuh loh hnuah Hamilton hi a la tho chhuak leh lo anga sawi theih a ni. Kuminah pawh chak ni hmel a la hmu miah lo a, pathumna a nih phak avang erawh chuan champion beiseina a la nei zel.

Max a lawm
Car intlansiakna sang berah a vawi 26 nana hnehna changtu Verstappen chuan, "Intlansiak tawp lam kha chu a nuamin a hautak ngei mai, hnehna ka chan theih nan khan theihtawp takmeuh ka chhuah. Carlos pawh khan kei ang bawkin a bei nasa.

"Chak duh ve ve inum kan nih avangin a awlsam lo, kawng kawi pakhata kawi zau hlek pawh thil pawi thei a nih tawh chuan taksa leh rilru a hah ṭhin," tiin a sawi a, a nomawi humhim chungchang erawh engmah sawi lawk theih a la ni lo tih a sawi bawk.

Pahnihna dinhmun luahtu, Ferrari driver Carlos Sainz chuan, "Intlansiak chhung zawng khan a tlan chak leh che rang zawk a ni zel a, tlan pelh ngaihna a awm lo. Ka tan chuan pahnihna nih hi a lawmawm, Max elphak tur chuan hmasawn ka la ngai," a ti.

Mercedes car khalhtu Hamilton pawh a dinhmunah a lawm. Lewis chuan, "Hmasawnna kan hmu, fans puihna ka dawng ṭha viau chunga pakhatna ka ni lo erawh a pawi ka ti. Team hnathawh a lang a, intlansiak hmasa aiin hma kan sawn," tiin a dinhmunah a lawm.

Hamilton hian F1 champion hnem ber nih fal a tumna chu season hmasa khan a hloh, amah ang bawka vawi sarih champion tawh Schumacher tlan pel tur chuan vawi khat champion a la ngai, kum 37 mi driver tan tun season-ah chuan record siam a harsa rih ang.