Berrettini tan Queen's Club title

Matteo Berrettini chuan Wimbledon atan inbuatsaihna a nei ṭha hle. Italian tlangval hian Pathianni zan khan Filip Krajinovic chu straight set hmanga hnehin Queen's title a la a, season hmasa lama a nomawi chawi a humhim.

Seeded pahnihna Berrettini-a'n final hi a khel ṭha viau, Serbian star Krajinovic lakah hian 7-5, 6-4 in a chak. A service vawi khat hloh ve mah se, a khingpui service hi vawi thum chhuhsak letin a buai phah lo.

Kum 26 mi Berrettini tan grass court hi hmun nuam a ni mek, grass-a match a khelh hnuhnung 21 zinga 20 zetah hnehna a chang thei. A chak loh hnuhnung ber chu season hmasa Wimbledon final kha niin, khatih laia world number 1 Novak Djokovic a ngam lo a ni.

World number 10 Berrettini chuan, "Ka tan chuan a hlu, insum miah loa ṭah vak mai ka duh. Tun hma chuan grass court-a inkhelh hi nuam ka ti ngai lo, mahse Queen's Club ka thlen hnuah chuan ka ngaihdan a danglam," tiin a sawi.

Wimbledon inbuat-saih nana tournament langsar berah hian Lleyton Hewitt, Andy Roddick, Andy Murray, Marin Cilic leh Feliciano Lopez te chu vawi khat aia tam an lo champion tawh, tunah chuan an zingah Berrettini hming ziah lan a ni tawh ang.