Nivia-in MFA 30% discount a pe

India rama sports bungraw siamtu lian Nivia Sports chuan Mizoram Football Association nen an thawh dunna kal zelah MFA leh a hnuaia mite chu an thil siam an leiin kum khat chhung 30% discount a pe.

Nivia-in MFA a duhsakna hi LBS Suzuki All Mizoram Inter Village Football Tournament Kick Off zanah puan a ni a, June 30, 2023 thleng discount hi pek a ni.

Discount chu
Nivia Sports hian an official website www.niviasports.com aṭanga thil lei, Rs 500 man chung lamah MFA pualin discount hi a siam a, 30% discount a pe dawn.

Discount tur hian coupon code - MFA30 tih chhut luh tel a ngai a, an website-ah 'Coupon Code' tih a awma chutah chuan 'MFA30' tih chhut luh hian a tlawmin an bungrua a lei theih dâwn a ni.

Hei hi tun aṭangin a hman ṭan theih a, kum khat chhung a nung ang.

Hlawkna chu
Mizoramah Nivia football leh futsal ball deuh hlir hman a ni a, hengte hi a ṭhen chu Nivia tih chuang si Nivia siam ni tak tak lote pawh a awm niin a lang.

Nivia bungrua hi online hmangin hmun hrang hrangah lei theih ni mah se an official website www.niviasports.com aṭanga lei hi an thil siam dik tak (genuine product) a ni a, hmun dangah leh bazar thenkhatah hian a lem (fake) zawrh a awm ṭhin avangin Nivia chuan an official website aṭanga chah ngei ni se an duh.

Football club nei hian kum khatah ball 10 vel hmang ta se, ball chu Rs 1,000 man a nih chuan kum khatah Rs 10,000 ball manah a seng dawn.

Nivia website lamah 'MFA30' tih coupon code hmangin lei ta se, Rs 10,000 aṭanga 30% (Rs 3,000) chu Nivia-in MFA a duhsakna kal tlangin a tlawm dâwn a, Rs 7,000 chauh a chawi ang.

Nivia website-ah hian football, futsal ball, football boot, jersey, tracksuit, football training equipment hrang hrang lei tur a awm. MFA puala duhsakna hmang ṭangkai turin MFA chuan a hnuaia DFA, Zone FA, club leh footballer zawng zawngte a sawm a ni.