Vawiin aṭangin Saidan Football Academy Trial

Sports & Youth Services Department chuan vawiin chawhma dar 10:00 aṭangin RG Stadium-ah RSTC Saidan Kolasib Football Academy 2022-2023 session-a awm tur trial a buatsaih dawn. Tun hnaiah khaw chhia avangin kawng ping a awm nual a, hemi a nih avang hian June 23, Ningani aṭanga trial hmachhawn thei ṭan chauh pawh hriatthiam an ni ang.

Saidan Football Academy Trial hi ni thum awh tur a ni a, June 21-23 chhung neih tur a ni. Leimin leh harsatna dangin a tihbuai loh tan chuan ni khatna aṭanga trial hmachhawn hi a pawimawh ang.

SYS enkawl football academy hi kum 14 hnuai lam mipa tan a ni a, an kum a dik ngei tih finfiah nan aadhar card/birth certificate ken tur a ni. Football dress kimchang nen trial hi hmachhawn tur a ni a, tiffin in pai tur a ni bawk.

Khelo India-a Mizoram champion player ṭhahnem zawk kha Saidan Football Academy chhuak an ni a, he academy aṭang hian ISL thlenga player langsar ni phak Lalengmawia (Apuia), Jerry Lalrinzuala, Isaac Vanmalsawma bakah player ṭhahnem tak an lo inzir tawh a ni.