Medvedev hnehin Hurkacz a champion

Hubert Hurkacz chuan Wimbledon khelh turah rinkai a ni phak dawn tih a takin a tarlang - Poland tlangval hian world number 1 Daniil Medvedev chu 6-1, 6-4 a hnehin Halle Open nomawi a chawi.

Germany rama khelh ATP 500 grasscourt tournament-ah Hurkacz a che ṭha hle a, final-ah tunlai player ṭha berte zinga mi hmachhawn mah se a buai lo, a tir aṭanga a tawp thlengin a dingnghet hle.

World number 12 Hurkacz hian season hmasa khan Wimbledon semifinal a thleng, a kalkawngah Medvedev leh vawi riat champion tawh Roger Federer a hneh hial, kuminah pawh en bik a hlawh dawn.

Nomawi a chawi hnuah Hurkacz chuan, "Insawizawina ṭha tak a ni," tiin twitter lamah a tarlang zui. June 27 aṭanga khelh tur Wimbledon atan a inpeih tih a sawina a ni thei ang.